ԱԺ-ում ՏՏ ոլորտը կարգավորող նոր օրենսդրական փաթեթի վերաբերյալ լսումների ժամանակ ԱԺ «Քաղաքացիական պայմանագիր» խմբակցության պատգամավոր Խաչատուր Սուքիասյանն անդրադառնալով հարկային քաղաքականությանն ասաց՝ ինքնազբաղի հարկի կարգավիճակը փոխելուց հետո բավականին մարդ գնաց Հայաստանից։
«Որովհետեւ ինքնազբաղը եկել էր Հայաստանի հանրապետության տարածք՝ անկախ մեր ենթակառուցվածքների որակից, նրանք ապրում էին այստեղ, վճարում էին բնակարանի համար, ապրելու համար, ծախս էին կատարում, բերեցին, խստացրեցին, սահմանափակեցին, դրանից հետո երեւի մի քանի հազար մարդ միայն դրա համար գնաց, որովհետեւ հազարավոր մարդիկ ինքնազբաղի կարգավիճակով Հայաստանում գործում էին»,-ասաց Սուքիասյանը։
Նրա խոսքով, երկար տարիներ է՝ մի հարց եմ բարձրաձայնում մեր բոլոր բարեփոխիչ պաշտոնյաների առջեւ․ «Ասում եմ Հայաստանում գեներացվում է 10 միլիարդից ավելի IT պրոդուկտ, այդ պրոդուկտը ինտերնետով է տեղափոխվում։ Բայց այդ պրոդուկտը մինչեւ անգամ մեր համախառն ներքին արդյունքի մեջ չի ներգրավվում, որովհետև միջազգային կազմակերպությունները այլ ֆորմուլա են տալիս հաշվարկելու։ Ուզում եմ սրա մասին նույնպես մտածեք, պարոն Պողոսյան, (դիմեց ֆինանսների փոխնախարար Արման Պողոսյանին, Ն․Բ․) որ հասկանանք, ոնց ենք ապագայում ներկայանալու»։
Անդրադառնալով ՌԴ-ից ՀՀ տեղափոխվածներին՝ ռելոկանտներին, Սուքիասյանն ասաց․ «Չպետք է մոռանալ, որ նրանք, ովքեր ՌԴ-ից տեղափոխվեցին Հայաստան, բոլոր միջազգային այն կազմակերպությունները, ովքեր մասնագետներին ասացին գնացեք Հայաստան, նրանք ուսումնասիրում էին, եւ նրանց ժամանակ էր պետք, որպեսզի լավագույն կադրերի վիզաների, բնակարանների խնդիրները լուծեին եվրոպական երկրներում, որպեսզ նրանք տեղափոխվեին։ Մի մասն այդ պատճառով է հեռացել։
Կարդացեք նաև
Բայց մեծ մասը հեռացել է մեր հարկային քաղաքականությունից, մեր ենթակառուցվածքների ոչ մրցունակ լինելուց, կարելի ասել՝ որոշ մասն էլ մեր ձմեռային ամիսներն իրենց այնքան էլ դուր չի եկել, գնացել են Թաիլանդ, որտեղ ավելի լավ պայմաններ կան, կենտրոններ կան, մինչեւ անգամ սուրճն է անվճար, նրանց համար վճարում են այս կամ այն վճարները։ Անցյալ տարի բերեցին առաջարկ, իրավաբանական անձի կարգավիճակ ունեցող IT կազմակերպություններին ինչ-որ գումարներ հատկացնել: Ասում էի՝ մի՛ արեք, թիրախային արեք, մեզ մասնագետն է պետք, որ Հայաստանում լինի։ Դա էլ այլ կերպ արվեց»։
Մանրամասն՝ տեսանյութում
Նելլի ԲԱԲԱՅԱՆ
