Ինչպես տեղեկացրել ենք, այսօր Գյումրու Անի թաղամասում դանակահարել են երկու երիտասարդ քույրերի, որոնց մարմնի տարբեր հատվածներում կտրած-ծակած բազմաթիվ վերքերով տեղափոխել են Գյումրի բժշկական կենտրոն։ Նրանցից մեկը 33 տարեկան է, մյուսը՝ 27։
Aravot.am-ին հայտնի դարձավ, որ կասկածյալը փոքր քրոջ նախկին ամուսինն է։ Դանակահարությունը տեղի է ունեցել նրանց շենքի մուտք մոտ։ Նախկին ամուսինն անընդմեջ փորձեր է արել երեխային տեսնել, երբեմն դիմադրության է արժանացել։
Այսօր էլ, տեսնելով, որ երկու քույրերը մտնում են շենքի մուտք, վնասել է նրանց։
Ինչպես ավելի վաղ տեղեկացրել էինք, ըստ Գյումրի բժշկական կենտրոնի փոխտնօրեն Արմեն Խաչատրյանի՝ քույրերից մեկին տեղափոխել են որովայնի թափանցող վնասվածքով, բարակ աղիների տարբեր հատվածների վնասումով, հեմոպերիտոնեում, տրավմատիկ-հեմոռագիկ շոկով, մարմին տարբեր մասերի կտրած-ծակած վերքերով։
Կարդացեք նաև
Մյուսի մոտ առկա են աջից ազդրի և ձախից հետույքային շրջանի, ինչպես նաև դաստակի կտրած-ծակած բազմաթիվ վերքեր։
Արմեն Խաչատրյանից քիչ առաջ տեղեկացանք, որ երկուսին էլ վիրահատել են, մեկը վերակենդանացման բաժանմունքում է, մյուսը տեղափոխվել է հիվանդասենյակ։
Կասկածյալը, մեր տեղեկություններով, դեռ ձերբակալված չէ։
Նունե ԱՐԵՎՇԱՏՅԱՆ
