Արցախցի հասարակական գործիչ Լիաննա Պետրոսյանի ֆեյսբուքյան գրառումը
Օգոստոսի 18-ին տեղի է ունեցել հանդիպում ՀՀ կրթության, գիտության, մշակույթի և սպորտի նախարար Ժաննա Անդրեասյանի հետ։
Հանդիպմանը ներկայացրել եմ կրթության բնագավառում Արցախից բռնի տեղահանված անձանց հուզող հիմնական խնդիրները։
Քննարկվել են բռնի տեղահանված անձանց՝ նախադպրոցական, հանրակրթության, միջին մասնագիտական, բուհական, հետբուհական կրթության հետ կապված, կորսված փաստաթղթերի վերականգնման, զբաղվածության և այլ առաջնահերթ հարցեր։
Կարդացեք նաև
2023թ տեղահանությունից հետո ՀՀ ԿԳՄՍ-ն իրականացնում է մի շարք ծրագրեր, որոնք միտված են՝ կրթական ոլորտում թեթևացնելու տեղահանված ընտանիքների սոցիալական բեռը, լուծելու մանկավարժների զբաղվածության խնդիրները։
Միաժամանակ՝ հաշվի առնելով տեղահանվածների սոցիալական ծանր վիճակը՝ առաջարկվել է.
-բռնի տեղահանված ընտանիքների՝ 2025-2026 ուս. տարում առաջին կուրս ընդունված սովորողներին ևս տրամադրել ուսման վարձի փոխհատուցում՝ մինչև տվյալ կրթական մակարդակում ուսումնառության ավարտը։
-սահմանված փոխհատուցում տրամադրել նաև այն դեպքում, երբ սովորողը տեղափոխվում է այլ ուսումնական հաստատություն կամ սահմանված կարգով փոխում է կրթական ծրագիրը՝ ելնելով արցախցիների՝պարբերաբար բնակության վայրը փոխելու խնդրից։
-Արցախից տեղահանված ուսուցիչների զբաղվածության ապահովում ծրագիրը երկարաձգել այն դեպքերում, երբ լրացել է պայմանագրով սահմանված երկու տարվա ժամկետը։
Նախարարը նշել է բարձրացված հարցերի կարևորությունը, որոշ հարցերի լրացուցիչ անդրադարձի անհրաժեշտությունը, որոնց արդյունքում ակնկալվում է, որ կլինեն առարկայական փոփոխություններ։
