Բրյուսելում մեկնարկել են Արցախի պատվիրակության կարևոր հանդիպումները Եվրոպական խորհրդարանի ազդեցիկ անդամների հետ։
ՀՅԴ Եվրոպայի Հայ դատի գրասենյակի (EAFJD) ջանքերով կազմակերպված այս այցի նպատակն է միջազգային ամենաբարձր հարթակներում բարձրաձայնել արցախահայության առջև ծառացած հումանիտար ու քաղաքական լուրջ մարտահրավերները։
Արցախյան պատվիրակության կազմում են Ազգային ժողովի նախագահ Աշոտ Դանիելյանը, Մարդու իրավունքների պաշտպան Գեղամ Ստեփանյանը, ՀՅԴ Արցախի ներկայացուցիչ Արա Պուլուզյանը և Թեմական խորհրդի անդամ Լեռնիկ Հովհաննիսյանը։ Նրանց ուղեկցում են Եվրոպայի Հայ դատի հանձնախմբի նախագահ Կասպար Կարապետյանն ու Բելգիայի Հայ դատի հանձնախմբի նախագահ Տիգրան Հովհաննիսյանը։
Բրյուսելյան օրակարգի շրջանակներում պատվիրակությունն արդեն հանդիպել է Եվրախորհրդարանի պատգամավոր, Հայաստանի հետ բարեկամության խմբի նախագահ Լուկաս Ֆուրլասի (ԵԺԿ խմբակցություն) և Սոցիալիստների ու դեմոկրատների առաջադիմական դաշինքի փոխնախագահ Յանիս Մանիատիսի հետ։
Հանդիպումների առանցքում Արցախի ժողովրդի իրավունքների պաշտպանության և միջազգային հանրության կողմից գործուն քայլերի ձեռնարկման անհրաժեշտությունն է։ Եվրոպացի գործընկերների հետ քննարկվել են այն կրիտիկական խնդիրները, որոնց այսօր բախվում է արցախահայությունը՝ թե՛ քաղաքական, թե՛ մարդասիրական տեսանկյունից։
Կարդացեք նաև
Այս այցը ևս մեկ անգամ փաստում է, որ չնայած ստեղծված բարդ իրավիճակին, Արցախի օրակարգը շարունակում է մնալ եվրոպական կառույցների ուշադրության կենտրոնում, իսկ հայկական կողմի հետևողական աշխատանքը միտված է ապահովելու Արցախի ձայնի շարունակական հնչեղությունը միջազգային ասպարեզում։
Հանդիպումների շարքը Բրյուսելում շարունակվում է՝ նոր հնարավորություններ ստեղծելով արցախահայության շահերի ներկայացման համար։
Արցախի Հանրապետության Ազգային ժողով
