«Մեղադրյալ Տիգրան Ղազարյանի նախաքննության ընթացքում տված ցուցմունքներում ու դատարանում տված ցուցմունքներում բավականին ուշագրավ տեղեկություններ կային: Բայց ես առանձնացրել եմ այն տվյալները, որոնք վերաբերում էին զինվորական կացարանի պայմաններին ու չափորոշիչներին, անձնակազմը այնտեղ տեղավորելուն ու վերադաս հրամանատարության, ընդհուպ մինչեւ ՀՀ զինված ուժերի ղեկավար կազմի ներկայացուցիչների իրազեկ լինելուն:
Մեկ անգամ եւս համոզվեցինք, որ ՊՆ ու ԶՈՒ գլխավոր շտաբի ղեկավար կազմը քաջատեղյակ է եղել կացարանի պայմանների, անձնակազմի պահման վիճակի մասին ու առկա թերությունները վերացնելուն ուղղված ոչինչ չեն իրականացրել: Այդ բարձիթողի վիճակը հանգեցրել է այս ողբերգական դեպքին: Եթե իրավասու մարմինների պաշտոնատար անձանց կողմից ժամանակին իրականացվեր ՀՀ գործող օրենքով իրենց վերապահված պարտականություններն ու լիազորությունները, հնարավոր է՝ այս ողբերգական դեպքը չունենայինք »,- այսօր «Ազատի» կացարանի հրդեհի գործով հերթական դատական նիստից հետո Aravot.am-ին ասաց «Ազատի» կացարանի գործով տուժողների ներկայացուցիչ Նորիկ Նորիկյանը:
Հիշեցնենք, որ այսօր հարցաքննված միակ անձը գործով մեղադրյալ Տիգրան Ղազարյանն էր: Նրան մեղադրանք է առաջադրվել, որ նա զբաղեցնելով ՀՀ ՊՆ 75937 զորամասի ինժեներական ծառայության պետի պաշտոնը, պատասխանատու լինելով իրեն վստահված ստորաբաժանման նյութական ապահովման համար, պարտավոր լինելով հսկողություն սահմանել հակահրդեհային պահանջների կատարման նկատմամբ, հետևել հրդեհային անվտանգության կանոնների պահպանմանը չի կատարել իր պարտականությունները: Իր պարտականությունների նկատմամբ անբարեխիղճ եւ անփույթ վերաբերմունքի հետեւանքով անզգուշությամբ առաջացել է մահ:
Կարդացեք նաև
Արփինե ՍԻՄՈՆՅԱՆ
