Երեւանի «Վերածնունդ» թաղամասի բնակիչներն այսօր փակել էին Ծիծեռնակաբերդի խճուղին՝ բողոքի ցույց անցկացնելով եւ պահանջելով, որպեսզի Երեւանի իշխանությունները լուծեն ճանապարհների անվտանգության հարցը։
Թաղամասի երեխաները կավիճներով հետիոտնային անցում են նկարել ճանապարհին, որտեղ անցում չկա։ Բնակիչների խոսքով՝ դեռեւս 2,5 տարի առաջ քաղաքապետ Տիգրան Ավինյանը խոստացել էր, որ թաղամասին հարակից Ծիծեռնակաբերդի խճուղում կտեղադրվի լուսացույց, կկառուցվի հետիոտնային անցում, բայց խոստումը չի կատարել։
Կարդացեք նաև
«4000 բնակչի թողել են կղզյակի մեջ, եւ մեր երեխաներն ամեն օր ճանապարհը սխալ հատելով՝ գնում են դպրոց ու տուն են գալիս։ Քաղաքապետի հետ հանդիպում եղել է 2,5 տարի առաջ, եւ ասել է՝ անձամբ խոստանում եմ մինչեւ սեպտեմբերի 1-ն այդ հարցը լուծված կլինի՝ սկզբում կկառուցենք հետիոտնային անցում, հետո արդեն 6 ամսվա ընթացքում՝ լուսացույց։ Դրանից անցել է 2 սեպտեմբերի մեկ, շուտով երրորդն է գալիս, չգիտեմ՝ ինքը որ սեպտեմբերի մեկն է նկատի ունեցել, միգուցե 10 տարի հետոյի համար է խոստումը տվել։ Դրանից հետո համատիրության անդամների հետ թաղապետարան ենք գնացել, ասել են՝ դիմում գրեք, որպեսզի շատ արագ այդ հարցին լուծում տանք, բայց ոչ ոք չի զբաղվում այդ հարցով։ Եվ 4000 բնակիչ, ամեն իր օր կյանքը վտանգելով, այս ճանապարհն անցնում է։ Հիմա ստիպված այս քայլին ենք դիմել, գուցե որեւէ մեկին կհետաքրքրի։ Նորմալ երկրներում նույնիսկ մետրոյի կայարան են կառուցում նոր թաղամասի համար, իսկ մեր ուզածն ընդամենը կանգառ է, մեկ զեբրա է, որպեսզի մեր երեխաներն ապահով գնան դպրոց ու վերադառնան»,- ասաց բնակիչներից մեկը։
Թաղամասին հարակից տարածքում ընդամենը մեկ կանգառ է տեղադրված՝ մեկ ուղղությամբ։ Ըստ բնակիչների՝ դա հարցը չի լուծում, խնդիրը դիմացի մայթի կանգառն է եւ հետիոտնային անցումը, որպեսզի մարդիկ կարողանան փողոցն անվտանգ հատել։
Որոշ ժամանակ անց բնակիչները բացեցին ճանապարհը եւ հայտարարեցին, որ ժամանակ են տալիս քաղաքապետարանին՝ խնդրին արձագանքելու ու լուծումներ առաջարկելու համար։ Եթե քաղաքապետարանը աշխատանք չիրականացնի այս ուղղությամբ, բնակիչները հաջորդիվ պատրաստվում են ավելի երկար ժամանակահատվածով փակել ճանապարհը։
Ռոզա ՀՈՎՀԱՆՆԻՍՅԱՆ
