ԱԺ ճեպազրույցում պատասխանելով Նիկոլ Փաշինյանի՝ մայիսի 9-ին Մոսկվայում կայանալիք շքերթին չմասնակցելու վերաբերյալ լրագրողի հարցին, ԱԺ «Հայաստան» խմբակցության պատգամավոր, ՀՅԴ անդամ Գեղամ Մանուկյանը նշեց. «Դպրոցներում երեխաներ կային, ասում էին՝ փորս է ցավում, սա է ցավում, ու այսպես պարբերաբար դասերից բացակայում են… Տարիներ առաջ մի աշխատակից ունեինք, որին, կարծեմ, 8-րդ անգամ տատի հուղարկավորությանը մասնակցելուց հետո խնդրեցի, որ իր տատիկների ցանկը տա։
Հիմա Նիկոլ Փաշինյանը կարող էր ասել, որ, օրինակ, կորոնավիրուսով է վարակվել 2 օրով, այդպես պլստար ու մայիսի 9-ին Մոսկվա չգնար։ Լուրջ չէ։ Եթե Փաշինյան ընտանիքի ներկայացուցիչը լիներ, գլուխը քարը, ինչ ուզում էին, թող ընտանիքում անեին, բայց, ցավոք սրտի, ներկայացնում է Հայաստանի Հանրապետությունը, իսկ դա լուրջ չէ»,- ասաց Գեղամ Մանուկյանը։
«Աշխարհում ընդունված չէ խոշոր տերությունների հետ անչափահաս երեխաների նման վարվել»,- հավելեց նա։
Անդրադառնալով Վեդիի դեպքին՝ Գեղամ Մանուկյանն, ի թիվս այլնի, ասաց, որ իրավական համակարգը ոչ միշտ է ադեկվատ. «Կեղծ, շինծու մեղադրանքներով մեր հազարավոր քաղաքացիների կարող է քրեական հետապնդման ենթարկել։ Բայց այնտեղ, որտեղ կա իրական քրեական, այլանդակ քրեական դեպք, ամիսներով կարող է մատը մատին չխփել»։
Կարդացեք նաև
Մանրամասն տեսանյութում
ԱԺ ճեպազրույցներն ամբողջությամբ
Գոհար ՀԱԿՈԲՅԱՆ
