ՌԴ նախագահ Վլադիմիր Պուտինը և Բելառուսի նախագահ Ալեքսանդր Լուկաշենկոն Աստանայում ԵԱՏՄ առաջնորդների հանդիպման շրջանակում կարճատև կարծիքներ են փոխանակել Հայաստանի շուրջ ստեղծված իրավիճակի վերաբերյալ։ Ինչպես հաղորդում է «ՌԻԱ Նովոստի»-ն, այս մասին հայտնել է ՌԴ նախագահի մամուլի քարտուղար Դմիտրի Պեսկովը:
«Նրանք հենց երեկ հանդիպման շրջանակում մի քանի անգամ զրուցել են։ Հայաստանի թեմայով կարճ կարծիքների փոխանակում եղել է, սակայն առարկայական զրույց չի կայացել, պարզապես ժամանակ չի եղել»,- լրագրողներին ասել է Պեսկովը՝ պատասխանելով այն հարցին, թե արդյոք Պուտինի և Լուկաշենկոյի զրույցներում բարձրացվել է Հայաստանի թեման։
«Միևնույն ժամանակ ոչ պաշտոնական ճաշի ընթացքում նրանք հնարավորություն են ունեցել բոլորը միասին բավական լավ և երկար շփվելու»,- նշել է Պեսկովը:
