Արտահայտելով իր դիրքորոշումը ԱԺ ընտրությունների լույսի ներքո Հայաստանում լայնորեն քննարկվող թեմայի շուրջ՝ կապված երկքաղաքացիության և Սփյուռքի մեր հայրենակիցների՝ Հայաստանում ընտրություններին քվեարկելու իրավունքի մասին, Սփյուռքի գործերով գլխավոր հանձնակատար Զարեհ Սինանյանն ասաց. «Մենք ունենք ՀՀ-ում բնակվող բնակչություն, որոնց ջախջախիչ մեծամասնությունը ՀՀ քաղաքացիներ են, որոնք հարկեր են մուծում, մեր բանակում ծառայում են, իրենց վաստակած գումարները ծախսում են ՀՀ տարածքում, իրենց քաղաքացիական պարտքն են կատարում և ոչ միայն օգտվում են քաղաքացիության կողմից ընձեռված իրավունքներից։
Այդ իմաստով, մեղմ ասած, մի քիչ տարօրինակ է, երբ մարդիկ քաղաքացիական պարտքի իրենց չափաբաժինը չեն կրում՝ ես սա չեմ ասում դատապարտելու իմաստով, զուտ փաստն եմ շեշտում, մի տեսակ ճիշտ չէ, որ մարդիկ, որոնք քվեարկելու են, բայց հետո չեն կիսելու այդ քաղաքական որոշումների հետևանքները, գան, քվեարկեն՝ գնան։
Հետևաբար, երբ որոշումը կայացվել էր, որ սահմանադրորեն կունենանք երկքաղաքացիություն, և մեր Սփյուռքի հայրենակիցները առանց որևէ պայմանի դառնան քաղաքացի, կարծում եմ, որ շատ խորը մտածված չի եղել։
Մանավանդ՝ հաշվի առնելով այն փաստը, որ Հայաստանը պետություն է, որն ունի համեմատաբար փոքր բնակչություն և համեմատաբար մեծ սփյուռք։ Այլ պետություններ այլ կերպ են մոտեցել։
Կարդացեք նաև
Հիշենք, որ Սովետական Միության փլուզումից հետո 20-35 տարիների ընթացքում մենք ունեցել ենք մոտ մեկ միլիոն դե ֆակտո քաղաքացիների արտահոսք, և ըստ այդմ, այդ մարդիկ քաղաքացի են և դրսում են՝ Հայաստանում չեն գտնվում»։
Աշոտ ՀԱԿՈԲՅԱՆ
