ՍԴ դատավոր Արթուր Վաղարշյանն այսօր «Միասնության թևեր» կուսակցության դիմումին անդրադառնալով՝ ասաց, որ այն շատ աբստրակտ է, ու խախտումների թվարկմամբ հանդերձ՝ չեն հիմնավորվում։
«Աբստրակտ միայն խախտումներ թվարկել՝ առանց ցույց տալու կամ ապացուցելու, դա ճիշտ չէ: Ըստ էության, ստացվեց, որ դիմումը աբստրակտ դիմում է: Կուզեի, որ բացատրեիք՝ արդյոք այդպիսի՞ն պետք է լինի Սահմանադրական դատարան ներկայացված դիմումը»,- հարցրեց դատավոր Արթուր Վաղարշյանը։
«Մեր համոզմամբ՝ բավարար չափով և՛ խախտումներն ենք ներկայացրել, և՛ կարողացել ենք մեր միտքը ձևակերպել առ այն, որ այդ խախտումները անաչառ դիտորդի մոտ այլ կարծիք չեն կարող թողնել, քան այն, որ ընտրությունները չեն անցել ազատ և հավասար»,- պատասխանեց «Միասնության թևեր» կուսակցության ներկայացուցիչ Լիպարիտ Դրմեյանը։
Կարդացեք նաև
Դրմեյանը նշեց, որ, օրինակ, եթե կուսակցությունների ֆինանսական հաշվետվությունները ճիշտ ներկայացված լինեին, ինչպես օրենքն է պահանջում, գերազանցվելու էր օրենքով սահմանված շեմը, և վրա էր հասնելու պատասխանատվություն կոնկրետ քաղաքական ուժի նկատմամբ։
Դատավոր Վաղարշյանը ճշտեց՝ այսինքն՝ ձեր թվարկած խախտումները հիմնավորված են այնքանով, որ հիմք են տալիս ընտրությունները անվավե՞ր հայտարարելու։ Դրմեյանը պատասխանեց. «Նշել ենք նաև, թե այդ խախտումները ինչ հետևանք են առաջացնում, դա բերում է ընտրողի ազատ կամքի ու ընտրություններին մասնակցող քաղաքական ուժերի հավասար պայմաններում մասնակցելու սկզբունքի խախտման։ Դա է, որ բերում է անվավերության»։
Հիշեցնենք, որ Սահմանադրական դատարանում այսօր շարունակվում է հունիսի 7-ին կայացած ընտրությունների արդյունքների վերաբերյալ ԿԸՀ որոշման դեմ 7 կուսակցությունների ներկայացրած դիմումների քննությունը, որով վիճարկվում են խորհրդարանական ընտրությունների արդյունքները։
Արփինե ՍԻՄՈՆՅԱՆ
