Կառավարությունն այսօրվա նիստում ընդունեց որոշում, որը ՊԵԿ նախագահ Էդուարդ Հակոբյանը ներկայացրեց որպես արտահանումները խթանելու համար կարեւոր բարեփոխումներից մեկը։ «Երկու հիմնական նպատակ է հետապնդում նախագիծը․ առաջինը՝ մաքսային սահմանով ապրանքների մեկնման գործառնությունների արագացում եւ անխոչընդոտ անցում՝ նախնական հերթագրման եւ մեկնող տրանսպորտային միջոցի վերաբերյալ տեղեկատվության հավաքագրման միջոցով։ Երկրորդը՝ պետական սահմանի անցման կետերում տրանսպորտային միջոցների կուտակումների բացառում»,- ասաց Էդուարդ Հակոբյանը։
Գործելու են կուտակային կայանատեղիներ, որտեղ պարտադիր կուտակվելու են բեռները, հետո ըստ հերթի տեղաշարժվելու են դեպի մաքսակետեր։ ՊԵԿ նախագահն ասաց, որ երեք կարեւոր առաջնահերթություն կա․ «Ունենք շուտ փչացող բեռներ, օրինակ, կենդանի ձուկ, միս, մսամթերք, կաթնամթերք, միրգ-բանջարեղեն։ Սրանք ունենալու են առաջնահերթություն։
Երկրորդը՝ առաջնահերթություն են ունենալու հատուկ մաքսային ընթացակարգերով ձեւակերպված ապրանքները, օրինակ, միջազգային միջոցառումներ ուղարկվող կամ դիվանագիտական բեռները, դոնորական առանձին ապրանքները։ Լիազորված տնտեսական օպերատորները, օրինապահ հարկ վճարողները, որոնք ունեն հավաստագրեր, կունենան առավելություն։
Եվ երրորդը՝ սահմանում ենք, թե տրանսպորտային միջոցները երբ կարող են չմտնել այդ կուտակային կայանատեղիներ։ Բացառիկ դեպքեր են դրանք, մասնավորապես, տարերային աղետների, բնական եւ տեխնածին բնույթի արտակարգ իրավիճակների հետեւանքների վերացման համար անհրաժեշտ ապրանքները կարող են առանց կայանատեղի մտնելու՝ անցնել սահմանը»։
Կարդացեք նաև
Մանրամասները՝ տեսանյութում
Հակոբյանն ասաց, որ սա միջազգային պրակտիկայում կիրառվող լավագույն լուծումներից մեկն է, որը նաեւ մեր հարեւան երկրներն ու ԵՄ-ն են կիրառում, ինչը հնարավորություն է տալու առանց հերթերի կուտակումների մաքսակետերում ապահովել բոլոր բեռների արագ անցումը։
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
