10-ամյա դաշնակահար Տիգրան Ղազարյանը վերջին ամիսներին բարձրագույն մրցանակների է արժանացել միջազգային 3 մրցույթներում՝ իր տարիքային խմբում ստանալով մեկ Պլատինե եւ երկու 1-ին կարգի մրցանակներ: Այդ մասին Aravot.am-ին տեղեկացրեց նրա մայրը՝ Լուսինե Մանուկյանը՝ նշելով, որ Տիգրանը նվագում է 4 տարեկանից:
Նրա հավաստմամբ, երաժշտական դպրոցի երկրորդ դասարանում, երբ Տիգրանին հանձնարարվեց ծրագիր՝ զարգացնելու երաժշտական տեխնիկան, բացահայտվեց, որ երեխան ոչ միայն բացարձակ լսողություն, այլեւ փայլուն հիշողություն ունի. էտյուդների գիրքը գրեթե ամբողջությամբ՝ 52 գործ, երեխան նվագում էր բացառապես հիշողությամբ:
Այժմ «Միմաս» դասական երաժշտական մրցույթի կողմից, որպես 1-ին կարգի մրցանակակիր, Տիգրանը հրավեր է ստացել մեկնելու Իտալիա եւ մասնակցելու «Միմաս» երաժշտական փառատոնին եւ Գալա համերգին: Մրցույթը միջազգայնորեն ճանաչված եւ ընդունված «Ալինք-Արգերիխ» հիմնադրամի անդամ է եւ հյուրընկալում է հայտնի եւ պրոֆեսիոնալ ժյուրիի կազմ, ինչը է՛լ ավելի է արժեւորում մրցույթն ու դրանում Տիգրանի հաղթանակը:
Կարդացեք նաև
Մինչ հոդվածը կհրապարակվեր, հայտնի դարձավ, որ փոքրիկ դաշնակահարը հնարավոր 100 միավորից ստանալով 95 միավոր՝ 1-ին կարգի մրցանակի է արժանացել նաեւ հեղինակավոր մեկ այլ՝ «Nouvelles Etoiles» միջազգային մրցույթում եւ ստացել համերգում ելույթ ունենալու հնարավորություն: Մայրը նշում է, որ Տիգրանի համար ամառն աշխատանքային է՝ Իտալիայի Պրոչիդա կղզում կայանալիք միջոցառումներին լավագույնս ներկայանալու համար:
Գոհար ՀԱԿՈԲՅԱՆ
