«2020-ին էլ եկել էր Սիսիան, մուրճը վերցրել, ասում էր՝ սենց եմ անելու, նենց եմ անելու, բայց ես նույն Սարգսյան Արթուրն եմ, պայքարել եմ և պայքարելու եմ»,-18 արդարների գործով դատական նիստի ընդմիջման ժամանակ լրագրողների հետ ճեպազրույցում ասաց 9-րդ գումարման ԱԺ պատգամավոր ընտրված, գործով մեղադրյալ Արթուր Սարգսյանը՝ անդրադառնալով ՀՀ վարչապետ Նիկոլ Փաշինյանի սպառնալիքներին։
Անդրադառնալով իր կալանքը երկարաձգելու վերաբերյալ նախագահող դատավոր Կարեն Ֆարխոյանի որոշմանը՝ Արթուր Սարգսյանն ասաց, որ դա իր համար կանխատեսելի էր․ «Մեկ տարի ասում եմ՝ այս դատարանը որոշում չի կայացնում, որոշումներն ուղարկվում են, այստեղ ընդամենը ընթերցվում են։ Դա պարոն Ֆարխոյանը հիմնավորեց, որի համար շատ շնորհակալ եմ»։
Հարցին՝ Ձեր աշխատանքն ԱԺ-ում ո՞նց եք պատկերացնում, Արթուր Սարգսյանը պատասխանեց․ «Ես ամեն ինչի պատրաստ եմ, իմ սկզբունքը ոչ թե կռիվ անելն է, այլ հայրենիք ունենալն է, եկեղեցի ունենալն է, և այս պայքարի ընթացքում իմ գիծը չի թեքվել, պայքարել եմ իմ հայրենիքի, սկզբունքների, եկեղեցու համար։ Իմ պայքարը շարունակվում է, որ օրը հնարավորություն ստեղծվի, նույն ձևով, ոնց հինգ տարիներին պայքարել եմ, այդ կերպ շարունակելու եմ»։
Տաթև ՀԱՐՈՒԹՅՈԻՆՅԱՆ
