Երբ խոսք է գնում առողջ հղիության պլանավորման մասին, հիմնական ուշադրությունը հատկացվում է մայրերին, սակայն նոր հետազոտությունը ցույց է տալիս, որ կարևոր դեր ունի նաև հայրերի սննդակարգը։
43 ընտանիքների մասնակցությամբ իրականացված հետազոտության ընթացքում փորձագետները պարզել են, որ բեղմնավորումից առաջ որքան շատ են ուլտրավերամշակված մթերքներ օգտագործում ապագա հայրերը, այնքան բարձր է ծանր քաշով նորածիններ ունենալու հավանականությունը։ Հետազոտությունը հրապարակվել է Nutrition Research ամսագրի հուլիսյան համարում։
Ծանր քաշը և կյանքի վաղ շրջանում ավելորդ ճարպի կուտակումը համարվում են հասուն տարիքում սրտանոթային և նյութափոխանակային հիվանդությունների զարգացման ռիսկի գործոններ։
Հետազոտողները կարծում են, որ ուլտրավերամշակված մթերքներով հարուստ սննդակարգը կարող է օրգանիզմում բորբոքային գործընթացներ առաջացնել, որոնք ազդում են սերմնաբջիջների որակի վրա և փոխում են որոշ գեների արտահայտվածությունը՝ նախքան դրանք երեխային փոխանցվելը։
Կարդացեք նաև
Ուսումնասիրության մեջ առանձնացվել է IGF-II գենը, որը ժառանգվում է բացառապես հորից և կարևոր դեր ունի պտղի աճի ու զարգացման գործընթացում։
Գիտնականների կարծիքով՝ հոր սննդային սովորությունները կարող են փոխել այդ գենի գործունեությունը՝ այդպիսով ազդելով պտղի զարգացման վրա։
Պարզվել է նաև, որ մոր սննդակարգը նույնպես կարևոր է, սակայն, ի տարբերություն հայրերի, հղիության վաղ շրջանում ավելի շատ ուլտրավերամշակված մթերքներ օգտագործած մայրերի երեխաները ավելի ցածր քաշով, ավելի կարճ հասակով և գլխի շրջագծով ծնվելու հակվածություն ունեն։
Հետազոտության հեղինակները նշում են, որ այս արդյունքները ևս մեկ անգամ ընդգծում են՝ ընտանիքի պլանավորման և առողջության պահպանման վերաբերյալ խորհուրդներ տալիս անհրաժեշտ է ուշադրություն դարձնել ոչ միայն ապագա մայրերին, այլև ապագա հայրերին։
Թարգմանությունը՝ Մարինե ԱԼԵՔՍԱՆՅԱՆԻ
