Aravot.am-ը ահազանգ ստացավ, որ Հ. Քոչարի փողոցում գտնվող թիվ 148 դպրոցում տեղակայված 4/27 ընտրատեղամասի մոտ կուտակումներ են եւ որ ավտոմեքենաներով եւ դպրոցի բակում հավաքված ինչ-որ տղաներ ընտրողների՝ մասնավորապես՝ մեծահասակների վրա հոգեբանական ճնշում են գործադրում. նրանց գրիչ են տալիս եւ ասում, որ հենց այդ գրիչով պետք է քվեարկեք: Հորդորել են նաեւ գրիչը հետ տանել. «Հասկանում եք, ներսում էլ են նույն գրիչները, բայց այստեղ հարցն այն է, որ մարդկանց վրա հոգեբանական ճնշում են գործադրում»,-մեզ հետ զրույցում ասաց ահազանգի հեղինակը:
148 դպրոցի բակում կուտակումներ առանձնապես չկային, բայց բակի նստարանի մոտ հինգ-վեց տղաներ էին հավաքված, որոնք ընտրատեղամաս եկող ընտրողներից հետաքրքրվում էին, թե ում են ընտրելու, նրանց ձեռքին ինչ-որ ցուցակներ կային, ուսին փոքրիկ պայուսակներ: Այս ընտրատարածքում տարիներ շարունակ ընտրությունները կազմակերպվել են դպրոցի միջանցքում, այս անգամ դրանք դպրոցի մի փոքրիկ սենյակում էին: «Սենց փոքր սենյակ են ընտրել, որ ինչ ուզեն անեն»,-դժգոհում էին վստահված անձինք:
Թիվ 4/27 ընտրատեղամասի հանձնաժողովի նախագահ Թաթուլ Մխիթարյանից հետաքրքրվեցինք, թե ինչու ավելի ընդարձակ տարածք չեն ընտրել: Թաթուլ Մխիթարյանի խոսքերով, «Միջանցքում սկվազնյակ էր, մեղք էին հանձնաժողովի անդամները, համ էլ այս տարածքում էդ ժողովրդի դեմը չէի կարա պահեի, ես մտածում եմ հանձնաժողովի անդամների մասին եւ մեր առողջության մասին»:
Այս ընտրատարածքում ընտրողների հետ եկած փոքրիկներին հանձնաժողովականները կոնֆետ էին բաժանում, ընտրակաշա՞ռք եք բաժանում Aravot.am-ի հարցին հանձնաժողովի նախագահը նկատեց՝ չէ, «մանկակաշառք»:
Ընտրության եկած քաղաքացիներից մեկը, որի անձնագրում հանձնաժողովի անդամներից մեկը կնիք դրեց, բորբոքված հարցրեց՝ «էս կնիքն էլ չի անցնելո՞ւ, բա ասում եք անցնելու ա», եւ ցույց տվեց իր անձնագրում նախագահական ընտրություններից մնացած կնիքը:
Կարդացեք նաև
Այս ընտրատեղամասում 1985 ընտրող կա, ժամը երկուսի դրությամբ ընտրությանը մասնակցել էր մոտ 600 ընտրող:
Լուսինե ԲՈՒԴԱՂՅԱՆ
