Լրահոս
Օրվա լրահոսը

Քամել, քամել մինչև վերջ

Հուլիս 22,2013 11:22

Երևանի քաղաքապետարանը, որպես տրանսպորտի ուղեվարձի թանկացման հիմնավորում ներկայացրել է մի հաշվարկ, ըստ որի միկրոավտոբուսով մեկ ուղևորի տեղափոխման ինքնարժեքը 138 դրամ է, իսկ ավտոբուսով տեղափոխման ինքնարժեքը` 149,8 դրամ:

Ըստ այդ հաշվարկի` մեկ միկրոավտոբուսը մեկ ամսում տեղափոխում է 5.850 վճարովի ուղևոր, իսկ ավտոբուսը` 10.680:
Եթե հաշվի առնենք, որ երթևեկության արժեքը մինչև հուլիսի 20-ը 100 դրամ էր, ապա ստացվում է, որ յուրաքանչյուր ուղևորից միկրոավտոբուսների գծատերը կրել է 38 դրամի վնաս, իսկ ավտոբուսի գծատերը` 49,8 դրամի վնաս:
Եթե այս թվերը բազմապատկենք ուղևորների ընդհանուր թվին` 5.850-ի և 10.680-ի, կստացվի, որ միկրոավտոբուսի գծատերը մեկ ամսում մեկ միկրոավտոբուսի շահագործումից կրում է 222.300 դրամի վնաս, իսկ ավտոբուսի գծատերը` 531,864 դրամի վնաս:
Հայտնի է, որ յուրաքանչյուր երթուղում փաստացի շահագործվում են 30 և ավելի միկրոավտոբուս և 20 ու ավելի ավտոբուս, ինչը նշանակում է, որ յուրաքանչյուր երթուղու գծատեր ամեն ամիս կրում է միկրոավտոբուսի դեպքում՝ առնվազն 6.669.000 դրամի վնաս, իսկ ավտոբուսի դեպքում` 10.637.280 դրամի վնաս:
Տարվա կտրվածքով այդ թվերը կազմում են` միկրոավտոբուսների դեպքում, առնվազն` 80.028.000 դրամի, իսկ ավտոբուսների դեպքում, առնվազն` 127.647.360 դրամի վնաս` յուրաքանչյուր գծի համար:
Ահա այսպիսին է մեր քաղաքապետարանի այն հիմնավորումը, թե ինչու է երթևեկության արժեքը թանկացվում:
Ես հակված չեմ հավատալու քաղաքապետարանի հաշվարկ հիմնավորմանն այն մասին, որ անցած տարիներին միկրոավտոբուսների ամեն մի գիծն իր գծատիրոջն ամեն տարի 80.000.000 դրամի կարգի վնաս է պատճառել, իսկ ավտոբուսինը` 125.000.000 դրամի կարգի վնաս, առավել ևս, որ դրա հիմքում ընկած է այն, որ իբր միկրոավտոբուսը երթուղու ամեն ուղղությամբ տեղափոխում է ընդամենը 15 ուղևոր (5850 ուղևոր : 30օրվա = 195 ուղևոր օրական: 195 ուղևոր : 13 ուղղություն` 6,5 երթ = 15 ուղևոր յուրաքանչյուր ուղղությամբ), իսկ ավտոբուսը (այստեղ 6 երթ է կամ 12 ուղղություն)` 30 ուղևոր:
Քաղաքապետարանի հաշվարկ անողները, միկրոավտոբուսների մասով կարող են առարկել, այն առումով, որ գազը թանկացել է և քաղաքապետարանի հաշվարկն արվել է 100 դրամ ուղեվարձի ու թանկացած գազի պայմաններում:
Սա էլ իրավիճակը չի փոխում, քանի որ գազը լցակայաններում թանկացել է ընդամենը 10 տոկոսով և եթե հաշվի առնենք, որ գազի ծախսը, ըստ քաղաքապետարանի հաշվարկի, կազմում է մեկ ամսվա ընդհանուր 807.190 դրամ ծախսից 262.900 դրամը, կամ 32,6 տոկոսը, ապա ստացվում է, որ դրա 10 տոկոսը 26.000 դրամ է, այսինքն` նախկինում նույն գազի համար մեկ ամսում վճարվել է 236.000 դրամ, իսկ թանկանալուց հետո` 262.900 դրամ, կամ յուրաքանչյուր օր 866 դրամ ավել, քան նախկինում:
Ահա ամբողջ իրականությունը. օրական 866 կամ ամսեկան 26.000 դրամ ավելի ծախսի փոխհատուցման համար միկրոավտոբուսների ուղեվարձը թանկացվում է 50 տոկոսով, առանց այն էլ առկա գերշահույթը դարձնելով էլ ավելի մեծ գերշահույթ:
Ավտոբուսների մասով, ընդհանրապես որևէ թանկացում առկա չէ:
Վերը նշված իրականությունն արդյունք է բիզնեսի ու քաղաքական իշխանության միահյուսվածության, որն էլ հնարավորություն է տալիս` ժողովրդին քամել մինչև վերջ:

Հ.Գ.Իմ հաշվառման հասցեն է` … Մեքենագործների փողոց… Պարզ է չէ՞, թե քանի միկրոավտոբուսի վարորդի ծանոթ կլինեմ: Քանի որ քաղաքապետարանի հաշվարկում ծախսերի մեջ նշված է նաև 150.000 դրամ աշխատավարձ, փորձեցի նրանցից ճշտել աշխատավարձի չափը: Վարորդներն ասում էին, որ հա, օրենքով պետքա աշխատավարձ լինի, բայց դե իրենք աշխատավարձ չեն ստանում…

Կարեն ՄԵԺԼՈՒՄՅԱՆ
Փաստաբան

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (2)

Պատասխանել

  1. Sargis says:

    Կեցցես Կարեն, հրաշալի ու հիմնավորված հաշվարկ ես արել,սակայն դա միակ ուղղությունը-ճյուղը չէ, որտեղ քաղաքապետարանի ,,ընտանիքը,, նաև օրենքները չրջանցելով՝ նույնիսկ,տեղական տուրքերի և վճարների անվան տակ հսկայական գումարներ է գանձում,իհարկե վերապահումներ կատարելով ,,յուրայինների նկատմամբ,,:Հիշենք օրինակ 2012թ.-ի հունվարի 1-ից գործող՝ դրանից մի քանի օր առաջ ընդունված և չմասսայականացված ,,աղբահանության մասին ՀՀ օրենքը,, և դրա հիման վրա ընդունված Երևանի Ավագանու որոշումը, որով օրական 2կգ աղբ /առավելագույնը/ ունեցող անհատ ձեռնարկատիրոջից գանձում են 2 տոննայի վճար…:Կարծում եմ ՀՀ Փաստաբանների Պալատը կարող է և պետք է բանիմաց փաստաբաններից /կամավորներից/ մի խումբ ստեղծել վարչական ու տեղական ինքնակառավարման մարմինների հակասահմանադրական ու օրենսդրական ակտերին չհամապատասխանող նորմատիվ ակտերը սահմանված կարգով վերացնելու կամ փոփոխելու համար:

  2. harut says:

    Կիսատ -պրատ հաշուարկումները դարձած են մանկական խաղեր։ Ով կարող է այսքան սուտերի մէջ լողացող ձկները բռնել։իշխանութիւնը իր գլխին հաւաքեր է ամէն մարզի մէջ կեղծարար մասնագէտներ բոլորն ալ փողկապաւոր նորելուկ փրոֆէսորներ աստուածաշնչեան անուններով
    ( Ահարոն-Մովսէս-Դաւիթ) որ չգիտես որտեղից յանկարծ դուրս են գալիս ընտրութիւններին եւ կարեւոր կողոպուտի մոմենտներին ։ կամ պիտի ենթարկուիս կամ ենթարկես զիրենք։ Երկրորդ տարբերակը ամենաճիշդն է ։

Պատասխանել

Օրացույց
Հուլիս 2013
Երկ Երե Չոր Հնգ Ուրբ Շաբ Կիր
« Հուն   Օգո »
1234567
891011121314
15161718192021
22232425262728
293031