«Ինստիտուտի գիտաշխատողների հետ մենք համագործակցում ենք: Հայագիտական մի շարք աշխատությունների վրա ենք այժմ աշխատում, որը նպաստելու է միայն հայ-իրանական հարաբերություններին»,-այսօր Թեհրանի Հումանիտար գիտությունների և մշակութաբանության ինստիտուտի պատվիրակության անդամների հետ հանդիպման ժամանակ նշեց Երևանի պետական համալսարանի ռեկտոր Արամ Սիմոնյանը:
ԵՊՀ-ում տեղի ունեցավ իսլամագիտության կենտրոնի բացման հանդիսավոր արարողությունը: Ռեկտորի խոսքով, ինստիտուտը լուրջ ներդրում ունի հումանիտար, մշակութային հետազոտությունների ոլորտում, այնտեղ հավաքված են նշանավոր գիտնականներ, պրոֆեսորներ.
«Իրանում կբացվի հայագիտական կենտրոն, իսկ մեզ մոտ իսլամագիտության կենտրոնում հնարավորություն կլինի ուսումնասիրել իսլամական փիլիսոփայություն, գրականություն՝ էթիկայի, գեղագիտության եւ բարոյագիտության խնդիրներով: Կենտրոնը կխորացնի եւ բազմազան կդարձնի իսլամագիտության մասին գիտելիքները»:
Կարդացեք նաև
Թեհրանի Հումանիտար գիտությունների և մշակութաբանության ինստիտուտի ղեկավար Համիթրեզա Այաթօլահիի խոսքով, Իրանի եւ Հայաստանի միջեւ կա բարեկամական կապ, նրանք ուրախ են, որ Թեհրանում բացվել է հայագիտության կենտրոն.
«Իրանի եւ Հայաստանի միջեւ կա բարեկամական եւ պատմական կապ, այս քայլի շնորհիվ երկու երկրների կապերի ամրապնդում կլինի: Ցանկանում ենք մեր երկրներին հետաքրքրող ոլորտներն արդյունավետ օգտագործել: Կարող ենք դասախոսություններ կազմակերպել նպատակը իրականացնելու համար»:
Ինստիտուտի ղեկավարի պնդմամբ, ուսումնասիրվող ոլորտները բազմազան են լինելու՝ ցանկալի է, որ հայ ուսանողները այցելեն Իրան եւ ծանոթանան իրանական մշակույթին, փիլիսոփայությանը, մտավորականներին, գիտնականներին: Իրանը եւ Հայաստանը համարվում են բարեկամ երկրներ, սակայն համագործակցությունը սահմանափակ է:
Անժելա ՇԱՀՈՒՄՅԱՆ
