Իրավապաշտպան Զարուհի Հովհաննիսյանը Aravot.am-ին որոշ մանրամասներ պատմեց օրեր առաջ Վանաձորում քրեական հեղինակություն «Ճաճոյի Էդոյի» որդու՝ Տիգրան Մարտիրոսյանի սպանությունից:
Նրա տեղեկություններով, այն պահին, երբ ոստիկանները մտել են Մարտիրոսյանների տուն, երեխաներից մեկը, որը գլխուղեղային քաղցկեղով հիվանդ է, ահավոր վիճակում է եղել, ցնցումների մեջ: Իրավապաշտպանի խոսքով, ամենայն հավանականությամբ, դեպքը տեղի է ունեցել երեխաների աչքի առաջ. «Այն ոստիկանները, որոնք մտել են տուն առաջին պահին վկայել են, որ կնոջ երեխան եղել է շատ վատ վիճակում, չեն նշել՝ որ երեխան»:
Հիշեցնենք, որ ըստ մամուլի հրապարակումների, սպանվածն ուներ երկու երեխա, մեկը՝ ութ, մյուսը՝ երկու տարեկան: Զարուհի Հովհաննիսյանի խոսքով` գրեթե բոլոր իրավապաշտպաններն են այս գործում ներգրավված, որպեսզի ապահովեն փոքրիկ երեխաների իրավունքների պաշտպանությունը, հոգեբանական աշխատանքներ տանեն նրանց հետ:
Իրավապաշտպանը նկատեց, որ այս պահին դատախազությունն ամեն ինչ անում է, որ սպանության մեջ մեղադրվող կնոջ նախնական կարգավիճակը լինի կալանքը. «Այս պահին դատախազությունը հիմնական դիմադրողն է, որ նախնական կալանքը պարտադիր կիրառվի: Բայց պետք է հասկանալ, որ կինը մարմնական վնասվածքներ ունի եւ ծանր հոգեբանական իրավիճակում է: Մանավանդ որ երեխաներից մեկն էլ գլխուղեղային քաղցկեղով է տառապում, այնպես որ դա եւս կարող է լինել մեղմացնող հանգամանք ու կալանքի չենթարկվելու հնարավորություն, մենք ամեն ինչ անելու ենք, որ կինը գտնվի իր երեխաների կողքին»,- ասաց Զարուհի Հովհաննիսյանը:
Արփինե ՍԻՄՈՆՅԱՆ
