Այսօր Վայոց ձորի մարզի Ռինդ գյուղում Արցախի զորամասերից մեկում երեկ սպանված Արամ Խաչատրյանի հոգեհանգիստն է: Այս մասին Aravot.am-ին ասաց գյուղապետ Հուսիկ Սահակյանը:
Ըստ նրա, Արամի սպանության տարբեր վարկածներ են պտտվում, առաջին՝ սպանությանը նախորդել է վիճաբանություն, երկրորդ՝ պատահական է կրակոցը հնչել:
Գյուղապետի բնորոշմամբ, Արամ Խաչատրյանը շատ խելոք տղա էր.
«Առայժմ որեւէ կոնկրետ բան հայտնի չէ, քննիչները զբաղվում են, մեզ համար էլ է անչափ հետաքրքիր պատճառը, հուսով եմ, որ անաչառ քննություն կտարվի: Երեկվանից Արամի հարազատների կողքին եմ, մի քիչ առաջ են բերել Երեւանից, ամբողջ գյուղը սգում է, հրաշալի, աշխատող երեխա էր: Հրազենային վնասվածքը կրծքավանդակի հատվածում է»,- ասաց գյուղապետը:
Նա նաեւ ասաց, որ Արամ Խաչատրյանը որեւէ կոնֆլիկտ չի ունեցել իր սպանության գործով այսօր ձերբակալված համածառայակցի՝ կրտսեր սերժանտի հետ: Արամ Խաչատրյանը ընտանիքի փոքր զավակն էր, ունի մեկ եղբայր, սոցիալապես ծանր վիճակում ապրող ընտանիքից էր, 9 ամսից էլ զորացրվելու էր:
Ըստ գյուղապետի՝ Արամ Խաչատրյանը ծառայությունից երբեւէ չի դժգոհել, միշտ բարձր տրամադրությամբ է հարազատների հետ խոսել:
Երեկ նախնական տվյալներով զենքի օգտագործման կանոնների խախտման հետևանքով, մահացու հրազենային վիրավորում են ստացել ՊԲ զինծառայողներ, 1998թ. ծնված Արամ Սիրեկանի Խաչատրյանը և 1997թ. ծնված Հրաչ Արարատի Ավետիսյանը: Այսօր արդեն քննչական կոմիտեն հաղորդագրություն տարածեց, որ Արամ Խաչատրյանը հրազենային վնասվածքը ստացել է 20.10.2017թ.՝ ժամը 12:40-ի սահմաններում, N զորամասի պահպանության տեղամասի մարտական դիրքում, աջ ուսագոտու շրջանում։ Զինհոսպիտալ տեղափոխվելու ճանապարհին զինծառայողն ստացած հրազենային վնասվածքից մահացել է:
Արփինե ՍԻՄՈՆՅԱՆ
