Հակոբ Գասպարյանի գլխավորած ՌԱԿ կենտրոնական վարչությունը (մրցակից ռամկավարների բնորոշմամբ՝ «Բեյրութի խմբակ») դիմել է նամակով այն ՀՌԱԿ-ին, որի ատենապետն է Հարություն Կարապետյանը՝ հայտնելով իր աջակցությունը։ «Առավոտի» կանխատեսմամբ, մոտ օրերս մեկ այլ ՌԱԿ կենտրոնական վարչություն, որը ղեկավարում են Երվանդ Ազատյանը եւ Հայկաշեն Ուզունյանը նույնատիպ նամակով կդիմի այն ՀՌԱԿ-ին, որի ատենապետն է Ռուբեն Միրզախանյանը։
ԱՆՀԱՇՏ ՀԱՐԵՎԱՆՈՒԹՅՈՒՆ
Նոր հասցեում է տեղակայվել Աշոտ Մանուչարյանի ղեկավարած՝ Հայաստանի սոցիալիստական ուժերի միությունը։ Ճակատագրի հեգնանքով, տարածքը տրամադրվել է ՀՀՇ-ի հարեւանությամբ՝ բակի կողմում գտնվող «Հայկոմունտրեստ» հաստատության չորրորդ հարկում։
ՀԱՐՍԱՆԻՔ Է, ՀԱՐՍԱՆԻՔ
Կարդացեք նաև
Բոլորովին վերջերս էր, որ «Միսս Հայաստան» տիտղոսին արժանացած Գոհար Հարությունյանը ճանաչվեց ԱՊՀ գեղեցկուհի։ «Առավոտին» հայտնի դարձավ, որ բոլորովին վերջերս նրա կյանքում եւս մեկ կարեւոր իրադարձություն է տեղի ունեցել՝ Գոհար Հարությունյանն ամուսնացել է՝ Ռոբերտ Քոչարյանի թիկնապահներից մեկի հետ։ Շնորհավորում ենք։
ՆԱԽԱՐԱՐԸ՝ ՌԵՍՏՈՐԱՆՈՒՄ
«Առավոտին» հայտնի դարձավ, որ իր սիրելի ժամանցի վայրն ունի ֆինանսների եւ էկոնոմիկայի նախարար Էդվարդ Սանդոյանը։ Իր շրջապատի ընկերակցությամբ, նա սիրում է հաճախակի ճաշել եւ ընթրել Թումանյան փողոցում գտնվող իտալական ռեստորանում։
ՍԵՆՍԱՑԻԱ՞
Երեկ Ազգային հեռուստատեսության «Դեմքեր» ծրագրում ՆԳ եւ ԱԱ նախարար Սերժ Սարգսյանը հայտարարեց, որ Հայաստանում, հնարավոր է, հայտնաբերվել է ՍՊԻԴ-ը բուժող դեղամիջոց, եւ այդ գյուտը կարող է ցնցել ողջ աշխարհը։
