Օգոստոսի 9-ին ՀՀ վարչապետ Վազգեն Սարգսյանն ընդունեց ԱՄՆ Կոնգրեսի հայկական հարցերով կոնգրեսական խմբի անդամներին՝ համանախագահներ Ջոն Փորթերի եւ Ֆրենկ Փալոնի գլխավորությամբ:
Պատասխանելով հյուրերի բազմաթիվ հարցերին, վարչապետն ասել է, որ այսօր կառավարության ամենակարեւոր խնդիրներից է՝ վերականգնել ռեֆորմների հանդեպ ժողովրդի վստահությունը, մասնակից դարձնել երկրի քաղաքացիներին տնտեսական գործընթացներին: Ուրեմն կառավարությունը պետք է պահպանի ազնիվ «խաղի կանոնները», հավասար պայմաններ ստեղծի տնտեսվարող բոլոր սուբյեկտների եւ արտերկրի ներդրողների համար: Վ.Սարգսյանը կարեւորել է նաեւ կոռուպցիայի դեմ ծավալվող պայքարը, ասելով, որ այդ խայտառակ երեւույթի այսօրվա ծավալները կարող են վտանգել ազգային անվտանգությունը: Խոսելով հայ-ամերիկյան հարաբերությունների ներկա փուլի մասին, ՀՀ վարչապետը շեշտել է, որ մեր երկիրը չի ցանկանում կառուցել արտաքին քաղաքականությունը գերտերությունների միջեւ հակասությունների վրա: «Հայ ժողովուրդը չի մոռանում, որ Ձեր երկիրն օգնության ձեռք է մեկնել Հայաստանին ամենադժվարին պահերին»,-ասել է Վ.Սարգսյանը:
Խոսելով ղարաբաղյան հակամարտության կարգավորման մասին՝ վարչապետը նշել է, որ Հայաստանի եւ Ադրբեջանի նախագահներ Ռ.Քոչարյանի եւ Հ.Ալիեւի հանդիպումը Ժնեւում հուսադրող էր, եւ շուտով բոլորս ականատես կլինենք այն քայլերին, որոնք անպայման կբերեն հակամարտության վերջնական կարգավորմանը:
ԱՐՄԵՆՊՐԵՍ
