Երեկ Կենտրոն եւ Նորք-Մարաշ համայնքների առաջին ատյանի դատարանում (նախագահող դատավոր՝ Պ. Օհանյան) ավարտվեց «Օրագիր» օրաթերթի գլխավոր խմբագիր Նիկոլ Փաշինյանի դեմ հարուցված քրեական գործի դատաքննությունը։
Մինչեւ պատիժն առաջարկելը մեղադրող Պ. Տեր-Հարությունյանը որպես «պատասխանատվությունը մեղմացնող հանգամանք» նշեց այն, որ Փաշինյանը երիտասարդ է, չդատված, «կարծեմ անչափահաս երեխա ունի, հա՞» եւ միջնորդեց վերջնական պատիժ նշանակել 3 տարի ժամանակով եւ տուգանքով՝ նվազագույն աշխատավարձի 20-ապատիկ չափով։ Նիկոլը, եթե այսօր դատարանը մեղադրողի միջնորդությունը հարգի, պատիժը պետք է կրի ընդհանուր ռեժիմի ուղղիչ աշխատանքային գաղութում։ Պաշտպանական ճառով հանդես է եկել եւ նրա պաշտպանը՝ փաստաբան Տ. Ջանոյանը, որը պահանջեց դատարանով անպարտ ճանաչել նրան։ Վերջին խոսքից օգտվեց եւ Ն. Փաշինյանը։ Այսօր պետք է ընթերցվի վճիռը…
Կարդացեք էջ 9։
ԳՈՐԾԸ ՔՆՆՈՒՄ Է ՆԳՆ ՔՆՆՉԱԿԱՆ ՎԱՐՉՈՒԹՅՈՒՆԸ
Կարդացեք նաև
Պատկան մարմինները չհերքեցին, բայց կցկտուր բացատրություններ տվեցին «Առավոտի» տեղեկությունը պարզաբանելու խնդրանքին ի պատասխան, թե ձերբակալվել են ռուսաստանցի վարձու մարդասպաններ, որոնց մոտ, ի շարս որոշ լուսանկարների, հայտնաբերվել է նաեւ ԼՂՀ նախկին ՆԳ նախարար Արթուր Աղաբեկյանի՝ Պռոշյան ավանում գտնվող սեփական տան հատակագիծը։ Քիլերներին պատվերը փոխանցողը եղել է ղարաբաղցի մի հեղինակություն՝ Հրաչ անունով, որն այժմ հետախուզման մեջ է։ Ենթադրվում է, որ պատվիրատուն ԼՂՀ բարձրաստիճան պաշտոնյաներից մեկն է։
ԿՈՄԿՈՒՍ-ՎԱՐՉԱՊԵՏ
«Ինչ-որ տեղ, կողմնակիորեն միգուցե, Վազգեն Սարգսյանը հանդիսանում է այն գաղափարների իրականացնողը, որոնք առաջ է քաշում Հայկոմկուսը։ Մեր կարծիքով, ռուս-հայկական ռազմաքաղաքական դաշինքի առաջամարտիկն ու գաղափարակիրն ինքն է այսօր՝ կամա, թե ակամա»,- այսպես գնահատեց Հայկոմկուսի առաջին քարտուղար Սերգեյ Բադալյանը Հայաստանի վարչապետին, որի խորհրդարանում ունեցած ելույթի վերաբերյալ ԱԺ խմբակցությունների մեկնաբանությունները կարող եք կարդալ 4-րդ էջում։
