«Արմենպրեսը» ԼՂՀ տեղեկատվության պետական վարչությունից ստացել է ներքոշարադրյալ հաղորդագրությունը. «ՊԲ նախկին հրամանատարը հոռետեսական երանգներով իր դժգոհությունն է հայտնում այն բանի առթիվ, որ ԼՂՀ իշխանությունները չեն ցանկանում նկատել «ընդդիմության գոյության փաստը երկրում»: Հայտարարության այս մասը իրոք համապատասխանում է իրականությանը, որովհետեւ հանրապետությունում չկա կառուցողական ընդդիմություն, այլ գոյություն ունի Ս.Բաբայանի մերձավորների նեղ շրջան, որը փորձում է հասարակության մեջ իրարանցում առաջ բերել, որպեսզի իշխանություններին շեղի նպատակադիր այն գործողություններից, որոնք ուղղված են նախկինում տեղ գտած իրավախախտումների բացահայտմանը, որ թույլ են տվել Ս.Բաբայանի հարազատներն ու մերձավորները: Վերջին շրջանում մամուլի հրապարակումները դրա ապացույցն են:
Ինչ վերաբերում է ԼՂՀ իշխանությունների հետ երկխոսությանը, ինչպես նաեւ նախկինում արված մեկ այլ հայտարարության, որ ինքը, իբր, պատրաստ է թողնել քաղաքական դաշտը, եթե ԼՂՀ «Երկրապահը» եւ Վետերանների միությունը միավորվեն, ապա պաշտոնական շրջաններում այն գնահատում են որպես քաղաքական խաղ՝ մեկ, եւ երկրորդ՝ երկու կազմակերպությունների միավորման խնդիրը ԼՂՀ իշխանությունների իրավասություններից դուրս է: Ս.Բաբայանի քաղաքականությամբ զբաղվելու կամ չզբաղվելու հարցը անձնական խնդիր է եւ չի կարող քննարկման նյութ լինել: Ի դեպ՝ քաղաքական նման «բարտերը» ընդունելի չէ:
ԼՂՀ նախագահը ոչ մեկ անգամ հրապարակավ հայտարարել եւ այժմ էլ հավաստում է, որ կառուցողական ընդդիմություն պետք է, որովհետեւ հանրապետությունում ժողովրդավարական գործընթացների խորացման գործում ընդդիմությունը լուրջ առաքելություն ունի: Այն պնդումները, թե ԱԺ մի քանի պատգամավորներ ինչ-ինչ հարցերում համամիտ չեն գործադիր իշխանության որոշ քայլերի, ապա դա բնական եւ բացատրելի երեւույթ է եւ իշխանությունների կողմից դա ընկալվում է որպես ժողովրդավարական հասարակության ատրիբուտներից մեկը: Ս.Բաբայանը եւ նրա շրջապատը ամեն կերպ փորձում են հասարակության մեջ գոյություն չունեցող, բայց լրատվական միջոցներում, մասնավորապես, «10-րդ նահանգ» եւ «Իրավունք» թերթերում աղմուկ-աղաղակ ձեւավորել, նպատակ ունենալով վարկաբեկել ԼՂՀ իշխանությունների այն քայլերը, որոնք ուղղված են հանրապետությունում օրինականության, կարգուկանոնի հաստատմանը եւ սոցիալ-տնտեսական հիմնախնդիրների լուծմանը: Ս.Բաբայանի սույն հայտարարությունը ոչ այլ ինչ է, քան քաղաքական կյանքում ջրի երեսին մնալու հերթական փորձ:
