«Սպայի պատիվ» կազմակերպության նախագահ, ԲԽՍՍ-ի նախկին տեսուչ Գագիկ Կոստանդյանը երեկ դժգոհեց, որ խորհրդարան մտնելիս շարքային պատգամավորները ստիպված են լինում զենքն ի պահ հանձնել, քանի որ անցնում են, ըստ նրա, «տամոժնու» միջով (իսկ իրականում՝ մետաղորսիչի)։ Մինչդեռ մեքենայով ԱԺ տարածք եւ, ըստ պրն Կոստանդյանի. մինչեւ III հարկ բարձրացողներին չեն ստուգում եւ նրանք կարող են զենքերը ներս բերել։ Իրենց զինաթափելու առնչությամբ պատգամավորը բացականչեց. «Այն մարդը, որ նման հանձնարարություն է տվել, առնվազն Եվրախորհրդի անդամ է»։
«ՄԻԱՍՆՈՒԹՅՈՒՆԸ» ՉԻ ՑԱՆԿԱՆՈՒՄ ԲԱՑԵԼ ԻՐ ԽՈՀԱՆՈՑԻ ԳԱՂՏՆԻՔԸ
Արտերկրում ընդունված է հրապարակել անվանիների մասնակցությամբ խնջույքների ճաշացանկը։ Փոխառելով այս առաջավոր փորձը՝ «Առավոտը» «Միասնություն» խմբակցության քարտուղար Վարդան Մկրտչյանից հետաքրքրվեց, թե ի՞նչ ուտեստներ էին մատուցվել նոյեմբերի 7-ին «Իգդիր» ռեստորանում վարչապետի մասնակցությամբ ՀՀԿ-ի եւ ՀԺԿ-ի համատեղ ճաշկերույթի ընթացքում։ Սակայն պրն Մկրտչյանն ընդվզեց. «Բացի նրանից, որ մենք պատգամավոր ենք, մենք նաեւ քաղաքացի ենք, եւ մեր անձնական երեկոն անցկացնելու իրավունք ունենք։ Եվ եթե մենք որոշել ենք հավաքվել՝ դա մեր ներքին խնդիրն է եւ չէի ուզենա, որ հրապարակվեր այդ խոհանոցը»։
Կարդացեք նաև
«ԻՆՏԵՐՆԵՏ»՝ ԿԱԼԱՆԱՎՈՐՆԵՐԻ ՀԱՄԱՐ
Այսօրվանից ուժի մեջ է մտնում «Բաց հասարակության ինստիտուտի» կողմից հովանավորվող ծրագիրը, Հայաստանի չորս կալանավայրերում տեղադրվելու են կոմպյուտերներ՝ «Ինտերնետով»: Ծրագրի իրականացման դրամաշնորհն է շահել TP agency լրատվական գործակալությունը:
