ՌԴ Կոմկուսի առաջնորդ Գենադի Զյուգանովը երեկ մասնակցեց ՀԿԿ 35-րդ համագումարին, ողջույնի ջերմ խոսք ասաց եւ մամուլի ասուլիս տվեց։ Ներկայացնում ենք մի քանի հարցերի պատասխաններ։ Նախորդ օրը Գ. Զյուգանովը հանդիպել էր ՀՀ նախագահ Ռոբերտ Քոչարյանին եւ ԱԺ նախագահ Արմեն Խաչատրյանին։ Ինչի՞ մասին են խոսել նախագահ Քոչարյանը եւ Գ. Զյուգանովը. «Մենք զրուցել ենք մեկ ժամ երկրի, աշխարհի իրավիճակի մասին, երկկողմանի հարաբերությունների մասին։ Ես խիստ անհանգստացած եմ այն իրողությամբ, որ տնտեսական կապերի տեմպերը թուլանում են։ Կարծում եմ, որ դարերի ընթացքում ձեւավորված տնտեսական, մշակութային, անձնական հարաբերությունները կզարգանան եւ ոչ թե հակառակը։ Խոսել ենք աշխարհում եւ Կովկասում տեղի ունեցող իրադարձությունների մասին։ Զրույցը հետաքրքիր էր եւ բարեկամական»։ Որքանո՞վ է իրական համարում Գ. Զյուգանովը Հայաստանի անդամակցությունը «Ռ.-Բ.»-ին։ Ըստ ՌԴ Կոմկուսի առաջնորդի՝ «աշխարհի ոչ մի երկիր առաջընթաց չի ունենա 21-րդ դարում, եթե ինքնաբավ չլինի։ Մենք Սովետական Միության շրջանակներում բացարձակ ինքնաբավ էինք։ Մենք ամեն ինչ ունեինք հաջող զարգացման համար»։
Ընկեր Զյուգանովն ուզում է, որ «Ռ.-Բ.» միությունն ուժեղանա, հզորանա, քանի որ ուրիշ ճանապարհ՝ համաշխարհային շուկա մտնելու, նախկին կորցրած շուկաները ետ վերադարձնելու, նա չի տեսնում։
Ղարաբաղյան հարցի կարգավորման վերաբերյալ. «Կովկասում, Բալկաններում եւ Մերձավոր Արեւելքում խաղաղ կարգավորում հնարավոր չէ՝ առանց Ռուսաստանի մասնակցության»։ Ռուսական զորքերը Կովկասում. «Հենց որ Ռուսաստանը սկսեց Կովկասից զորքերը դուրս հանել, անմիջապես սկսվեց ապակայունացումը։ Դա ամեն ոք է հասկանում։ Եվ Չեչնիան առաջինը չէ, այլ՝ հինգերորդ պատերազմն է, եթե ժամանակին ճիշտ հետեւություններ արվեին, իրավիճակն այլ կլիներ»։ Կովկասյան տարածաշրջանի կարգավորման այլ տարբերակ Գ. Զյուգանովը չի տեսնում, քան՝ ռուսական զինված ուժերի հետ սերտ համագործակցությունը։
Գ. Զյուգանովը Հայաստանի Կոմկուսի մասին. «Ուժեղ կազմակերպություն է, լավ հեղինակություն ունի։ Սերգեյ Բադալյանը հրաշալի հիմք է դրել, պետք է այն ամրացնել եւ շարունակել։ Մենք դրանում խիստ շահագրգիռ ենք»։ ԲՑ-ների մասնավորեցման մասին. «Կորցնեք վերահսկիչ փաթեթը՝ կախված կլինեք ամբողջ աշխարհից»։
Կարդացեք նաև
Մ. ԵՍԱՅԱՆ
