Երեկ «Հոկտեմբերի 27» քրգործի դատաքննության ժամանակ դատական նիստերի քարտուղար Մարիամ Ստեփանյանը հասցրեց ընթերցել ամբաստանյալ Նաիրի Հունանյանի այս տարվա մայիսի 10-ի, 11-ի, 16-ի, 17-ի եւ 21-ի դատաքննական ցուցմունքները։
Ընթերցման պահին գրառումներ էր կատարում ամբաստանյալ Ն. Հունանյանը, եղբայրը ցինիկորեն ժպտում էր (տեղ-տեղ), իսկ ամբաստանյալ Էդիկ Գրիգորյանը կարծես ննջում էր…
Մինչ ցուցմունքները կընթերցվեին, ամբաստանյալ Ն. Հունանյանը միջնորդեց իրեն տրամադրել եղբոր անձնական գործը եւս, ինչի կապակցությամբ դատավոր Սամվել Ուզունյանն ասաց, թե այն կտրամադրվի դատական նիստի մասնակիցների ծանոթացումից հետո։ Նա միջնորդեց նաեւ քրեական գործի պատճեններն իրեն տրամադրել։
«Շաբաթվա վերջում»,- կարճ կտրեց դատավորը։
Կարդացեք նաև
Այս ուրբաթ, ինչպես եւ կանխատեսել էինք, կավարտվի ցուցմունքների հրապարակումը եւ կսկսվի հարցաքննությունը։ Ամբաստանյալ («ազատ») Միսակ Մկրտչյանը երեկ դատարան էր ներկայացել իր լուսանկարչական ապարատով, ինչը արգելվեց։
Եվ նա մեր մասնավոր զրույցի ժամանակ հարցնում էր. իրավունք չունի՞։
Կողմերի հավասարության սկզբունքը վկայակոչելով՝ բացատրեցինք, որ չունի։ Այլապես վանդակների ետեւում գտնվողները կպահանջեին նույնպիսի ապարատ՝ հավասար պայմաններում հայտնվելու համար։
Ռուզան ՄԻՆԱՍՅԱՆ
Լուսանկարը՝ հեղինակի:
