ՀՈԲԵԼՅԱՆԱԿԱՆ ԹԱՏԵՐԱՇՐՋԱՆ Երեկ Գ. Սունդուկյանի անվան պետական ակադեմիական թատրոնում տեղի ունեցավ մամուլի ասուլիս՝ նվիրված թատրոնի հիմնադրման 80-ամյակին։ Թատրոնի գեղարվեստական ղեկավար Վահե Շահվերդյանը նշեց, որ 2002 թվականը հոբելյանական է թատրոնի համար։ Մարտի 27-ից նախատեսվում են «Կտակը», «Հին աստվածներ», «Բալենու այգին», «Ե՛վ միշտ, ե՛ւ երբեք», «Բեռնարդան եւ նրա աղջիկները» պիեսների բեմադրությունները։ Այս տարի նախատեսված է նաեւ ժամանակակիցների ստեղծագործությունների բեմադրություն, որոնց թվին է պատկանում Ժորա Հարությունյանի «Պարոն Շմոնը»։ 15 օր առաջ դրամատուրգիական հայտ է ներկայացրել Ռոլանդ Շառոյանը։ Գործը կոչվում է «Մեր բաժին ուրախությունը», այն վերամշակվել եւ ընդունվել է բեմադրության։ Թատրոնը նախատեսում է նաեւ հյուրախաղերով հանդես գալ Հայաստանի որոշ մարզերում եւ ԼՂՀ-ում։ Պրն Շահվերդյանը նշեց նաեւ, որ թատրոնն ամեն տարի կազմակերպում է «Արտիստ» մրցանակաբաշխություն։ Անցյալ տարի «Արտիստ» մրցանակը շնորհվել էր Մետաքսյա Սիմոնյանին, իսկ այս տարի՝ նույնպես հետմահու, մրցանակ կշնորհվի Բաբկեն Ներսիսյանին։ ՄԱՐԻ ՉԻԼԻՆԳԱՐՅԱՆ ԱՐՇԱԼՈՒՅՍ ՀԱԿՈԲՅԱՆ