Մոսկվայում դատը հետաձգվեց «Էքս»-սրբազանի միջնորդությամբ Փետրվարի 21-ի դատավարությունը տեղափոխվեց մարտի 22։ Հայաստանյան տեղեկությունների համաձայն, վերոնշյալ դատավարությունն ընդդեմ Հայ առաքելական եկեղեցու Ռուսաստանի եւ Նոր Նախիջեւանի թեմի էքս-առաջնորդի էր՝ Տիրան արքեպիսկոպոս Կյուրեղյանի (իբրեւ հափշտակություն, գողություն)։ Իրականում ներկայիս թեմի առաջնորդը՝ Եզրաս եպիսկոպոս Ներսիսյանը «Մոսկվայի կրոնական համայնքը» լուծարելու հայցով է դիմել դատարան։ Որքան կարողացանք ճշտել, պատասխանողն էլ արդարադատության նախարարության Մոսկվայի գլխավոր վարչությունն է, որը, ըստ հայցվորների, ապօրինի է գրանցել վերոնշյալ… համայնքը։ Մոսկվայում մեր գործընկերը դատավարության օրը հանդիպել էր Տիրան սրբազանի հետ, որն էլ հայտնել էր, որ դատը հետաձգվել է իր խնդրանքով. ժամանակ տրամադրելու գործի նյութերին ծանոթանալու եւ փաստաբան գտնելու համար։ Տիրան Կյուրեղյանի ձեւակերպմամբ, իրեն թեմի առաջնորդից հանելը ապօրինի է։ Ըստ նրա, «որեւէ հոգեւորական, եթե խախտում է եկեղեցական կանոնները, հրավիրում են Գերագույն հոգեւոր խորհրդի նիստ, նախազգուշացնում են։ Եթե տրված ժամկետում էլ շարունակվում են խախտումները, հրավիրում են եկեղեցական ժողով։ 213-րդ ձայնով հոգեւորականը կարգալույծ է արվում»։ Ի դեպ, կարգալույծ արվածը չի կարող այլեւս ծառայել… եկեղեցուն։ Արգելվում է նրան վեղար կրել եւ մտնել եկեղեցի… Տիրան Կյուրեղյանը 26 տարի ծառայել է Հայ առաքելական եկեղեցուն եւ իրեն «պաշտոնից» զրկելը նա ուղղակիորեն համարում է «չարամտություն»։ «Թող ստեղծվի հանձնախումբ Հայաստանի գլխավոր դատախազության, Ռուսաստանի, Էջմիածնի եւ հասարակական կազմակերպությունների կողմից, եթե իսկապես կան ինչ-որ մեղադրանքներ, պատրաստ եմ կրել պատիժը»,- գտնում է նա։ «70 տարիների ընթացքում թեմի առաջնորդի նշանակումը լինում էր Մոսկվայի կողմից։ Բայց չէին կարող գրել, թե Մոսկվան է նշանակում։ Գրում էին՝ կաթողիկոսն է նշանակել։ 1991-ին չկար Խորհրդային Միությունը եւ Ռուսաստանն էլ անկախ պետություն էր։ Հետեւաբար, 1995թ. նոր կանոնադրությամբ Հովիվը ընտրվում էր։ Իսկ դա չհաստատվեց էջմիածնի կողմից։ 1997-ին Ռուսաստանում ընդունված խղճի եւ կրոնի ազատության մասին օրենքի նոր խմբագրմամբ մենք ստիպված էինք փոխել մեր կանոնադրությունը՝ համապատասխանեցնելով նրանց օրենքին»,- ասում է Տիրան Կյուրեղյանը (այսօր արդեն կարգալույծ արված, սակայն ՌԴ նախագահի բարձր պարգեւին՝ շքանշանին արժանացած)։ Ինչ վերաբերում է Մոսկվայի կրոնական համայնքը Անթիլիասին «միացնելու» երեւանյան լուրերին, նախկին առաջնորդն ասաց, թե «եղել է հավաք։ Նպատակը՝ փրկել Էջմիածինը։ Անթիլիասը անբաժանելի մասն է էջմիածնի։ Անթիլիասը չի խառնվել։ Կա տեղի մոտեցումը։ Ուրիշ ելք չկար, Էջմիածինը մղում է դրան։ Մի ողջ ռուսահայ համայնք անտեսվում է Էջմիածնի կողմից»։ Տիրան Կյուրեղյանը խոստացավ հրապարակել անուններ, որոնք միջեկեղեցական այսօրինակ վեճում ներկայացնելով հանցագործ աշխարհը, փորձել են աշխարհիկ հայտնի տարրեր խառնել… Սեփ. լր.