«ԱՐՏԱՎԱԶԴՆԵՐԸ» ԲԱՇԽՎԵՑԻՆ Երեկ Երեւանի կոնյակի գործարանում կայացավ Թատերական գործիչների միության «Արտավազդ» ամենամյա մրցանակաբաշխությունը, նաեւ Թատրոնի միջազգային օրվան նվիրված հանդիսությունը։ Միջոցառումը հագեցած էր պարգեւներով։ Սկզբում հանրապետության թատրոնների որոշ աշխատակիցներ պարգեւատրվեցին կոնյակներով, ապա Բեյրութի ՀԲԸՄ երիտասարդական ընկերակցության կողմից Սփյուռք-Հայաստան կապերի զարգացման համար հուշանվեր հանձնվեց ՀՀ մշակույթի, երիտասարդության հարցերի եւ սպորտի նախարար Ռոլանդ Շառոյանին։ Վերջինս ուրախացավ, որ գոնե Սփյուռքում իրեն գնահատում են։ Մեծ «Արտավազդ» մրցանակով հետմահու՝ «Ազգային արվեստին արժանապատիվ եւ անբասիր ծառայության համար» պարգեւատրվեց ՀՀ ժողովրդական արտիստ Ավագ Պետրոսյանը։ «Արտավազդ» մրցանակներ ստացան նաեւ Ստանիսլավսկու անվան թատրոնը՝ «Քանդած օջախ» ներկայացման համար (ռեժիսոր՝ Արմեն Էլբակյան), սիրված դերասանուհիներ Մարգո Մուրադյանը, Հեղինե Հովհաննիսյանը։ Փոքր «Արտավազդ» մեդալներ ստացան Կապանի թատրոնից՝ Վազգեն Սարգսյանը, Դրամատիկական թատրոնից՝ Հովհաննես Բաբախանյանը, Սունդուկյանի թատրոնից՝ Կարեն Ջանգիրյանը, Պարոնյանի թատրոնից՝ Բորիս Պեպանյանը, Համազգային թատրոնից՝ Դավիթ Հակոբյանը, Պատանի հանդիսատեսի թատրոնից՝ Արթուր Կարապետյանը, Ստանիսլավսկու թատրոնից՝ Ֆրեդ Դավթյանը։ Առանձնահատուկ հիշվեց Պարոնյանի թատրոնի վաստակավոր դերասանուհի Սվետլանա Գրիգորյանը, որի բեմական գործունեության 50-ամյակն է լրանում այս տարի։ Նրա մասին գրված գիրքը նվիրեցին Կոնյակի գործարանի տնօրինությանը՝ հայ մշակույթի գործիչների հանդեպ բացառիկ ուշադրության համար։ Մ. Բ.
