«ՈՍԿԵԳՈՐԾՈՒԹՅՈՒՆՆ» ԱՄՓՈՓՎԵՑ Մայիսի 23-ին ոսկու գործարանում կայացած մամլո ասուլիսը, որը բացեց ոսկեգործների ու ակնագործների միության նախագահ Էմիլ Գրիգորյանը, ամփոփումն էր «Ոսկեգործություն 2002» միջազգային ամենամյա 5-րդ ցուցահանդես-վաճառքի։ Պրն Է. Գրիգորյանը նշեց, որ ի սկզբանե տոնավաճառին մասնակցելու ցանկություն էին հայտնել 15 երկրների թվով 25 ֆիրմաներ, սակայն մասնակցել են 15 ֆիրմաներ՝ 8 երկրներից՝ Ռուսաստանից, Վրաստանից, Ֆրանսիայից, Թուրքիայից, Ուզբեկստանից եւ այլն։ Ընդհանուր հաշվով, ցուցահանդես-տոնավաճառ այցելել է 6 հազար մարդ։ Ըստ պրն Գրիգորյանի, մասնակիցների մեծ ցանկը ցույց է տալիս, որ Հայաստանի ոսկեգործ-ակնագործները արդեն հաստատորեն ինտեգրացված են համաշխարհային ոսկեգործության ոլորտին։ Նշանակալից է նաեւ այն, որը տոնավաճառի ընթացքում հանդիպում են խոշոր վաճառականներ, արտադրողներ եւ պարզաբանում իրենց փոխադարձ հարաբերությունները, ինչպես նաեւ արտադրություն-վաճառք ծավալները։ Տոնավաճառի բացասական կողմը, ըստ նախագահի, մնում է Հայաստանում մեծավաճառների չկազմավորված դասը, փոքրավաճառների չմասնակցելու փաստը։ Դա նոր պայմանագրեր կնքելու հնարավորությունների կորուստ է։ Պրն Գրիգորյանը լրագրողներին պատմեց նաեւ տոնավաճառի ընթացքում հայ ոսկեգործ-ակնագործների միության գումարած հերթական 3-րդ ընդհանուր ժողովի մասին, որտեղ միության խորհուրդը հանդես է եկել հաշվետվությամբ եւ կատարվածը գնահատվել է «բավարար»։ Արդյունքում կնքվել են 2001-ից 12%-ով ավելի պայմանագրեր, մասնավորապես՝ բանկային ձուլակտորներ ձեռք բերելու, սարքավորումներ գնելու եւ այլնի։ Ինչպես նաեւ մասնակցելու Վինչենցոյում, Լաս Վեգասում, Մոսկվայում այս տարվա ընթացքում կազմակերպվելիք տոնավաճառներին։ ՄԱՐԻՆԵ ԴՈԽՈԼՅԱՆ
