Այն, որ մայիսի 12-ին կայանալիք խորհրդարանական ընտրությունների ժամանակ ամենաթեժ ու անզիջում պայքարն ընթանալու է իշխանական երկու կուսակցությունների՝ «Բարգավաճ Հայաստանի» եւ «Հանրապետականի» միջեւ՝ թերեւս, կասկած այլեւս չի հարուցում: Ըստ ամենայնի, նաեւ հենց այս է պատճառը, որ ընտրությունների թեման հիմա՝ առավել եւս ընդդիմության միավորման ձախողումից հետո, հիմնականում այն է, թե հիշյալ կուսակցություններից ով եւ ինչպես է ներկայացված լինելու կառավարությունում եւ խորհրդարանում: Դա կարեւոր է նաեւ 2008թ. նախագահական ընտրությունների նախապատրաստության առումով:
Ըստ մեր ունեցած տեղեկությունների, որոնք, բնականաբար, վերջնական չեն, ՀՀ ապագա կառավարության պորտֆելները բաշխվելու են հիմնականում հիշյալ կուսակցությունների միջեւ ըստ նրանց՝ ՀՀ ԱԺ-ում ստացած մանդատների համամասնության:
Ըստ այդ ենթադրությունների, ՀՀ վարչապետ է նշանակվելու ՀՀԿ խորհրդի նախագահ Սերժ Սարգսյանը, ով ՀՀԿ համամասնական ցուցակում երկրորդն է: ՀՀ ԱԺ նախագահի պաշտոնում երկու հավակնորդի անուն է նշվում՝ Տիգրան Թորոսյան եւ Դավիթ Հարությունյան: Իհարկե, վերջինս մի նեղ շրջանակում հայտարարել է, թե ինքը կուզենար ընդգրկվել ԱԺ որեւէ, իսկ ավելի կոնկրետ՝ պետաիրավական հանձնաժողովում, որն էլ, թերեւս, կգլխավորի:
Ինչ վերաբերում է կառավարության անդամներին, ապա մենք կնշենք միայն այն նախարարություններում հնարավոր փոփոխությունները, որոնց վերաբերյալ ՀՀ նախագահը որոշակի խոստումներ է տվել, մասնավորապես, ԲՀԿ-ին: Այսպես, առողջապահության նախարարի պաշտոնում նշվում է երկու անուն, որոնք ընդգրկված են ԲՀԿ համամասնական ցուցակում՝ Հարություն Քուշկյան եւ Մխիթար Մնացականյան՝ Հայկական կարմիր խաչի նախագահ:
Առեւտրի եւ տնտեսական զարգացման նախարար Կարեն Ճշմարիտյանն, ամենայն հավանականությամբ, ընտրություններից հետո կղեկավարի ԱԺ հանձնաժողովներից մեկը, իսկ նախարարի աթոռին առայժմ որեւէ հավակնորդի անուն չի նշվում: Հավանաբար այդ պաշտոնը կստանձնի խորհրդարանական կոալիցիայի երրորդ ուժի (ասենք, Դաշնակցության) թեկնածուն: Նույնն է իրավիճակը նաեւ մի քանի այլ նախարարություններում:
Ֆինանսների նախարարի պաշտոնում ընտրություններից հետո կարող է նշանակվել ԲՀԿ անդամ, համամասնական ցուցակի 9-րդ հորիզոնականը զբաղեցնող, տնտեսագետ Վարդան Բոստանջյանը, իսկ գործող նախարար Վարդան Խաչատրյանն ԱԺ-ում կգլխավորի ֆինանսավարկային եւ բյուջետային հարցերի հանձնաժողովը:
Մշակույթի եւ երիտասարդության հարցերի նախարարի պորտֆելը թողնված է ԲՀԿ անդամ, համամասնական ցուցակում 2-րդ տեղը զբաղեցնող Արամ Իսաբեկյանին:
