Ծանրամարտի Եվրոպայի թիմային չեմպիոն հայաստանցի ծանրորդների եւ նրանց մարզիչների մեծարումը Հայաստանում շարունակվում է: Երեկ նրանց ընդունեց հանրապետության նախագահ Ռոբերտ Քոչարյանը: Երկրի ղեկավարը շնորհակալություն հայտնեց այն փառահեղ պահերի համար, որ նրանք իրենց հաղթանակներով պարգեւել են բոլորիս: Միաժամանակ նշվեց, որ հաղթանակի հետ մեկտեղ դեռեւս անելիքներ շատ կան՝ առջեւում օլիմպիական խաղերն են, իսկ սեպտեմբեր ամսին Թաիլանդում կայանալու է աշխարհի առաջնությունը, որին նույնպես պետք է լրջորեն նախապատրաստվել:Այնուհետեւ ֆեդերացիայի նախագահ Սամվել Խաչատրյանը, հավաքականների մարզիչները եւ մարզիկները «Տեսակետ» ակումբում հյուրընկալվեցին լրագրողներին:Իսկ երեկոյան Ալեքսանդր Սպենդիարյանի անվան օպերայի եւ բալետի թատրոնում մեր աղջիկների ու տղաների մեծարման երեկո էր կազմակերպել Հայաստանի ազգային օլիմպիական կոմիտեն: ՀԱՕԿ-ի նախագահ Գագիկ Ծառուկյանը վստահություն հայտնեց, որ հանրապետությունում սպորտն աստիճանաբար կվերադարձնի երբեմնի բարի համբավը, մեդալներ կլինեն նաեւ մյուս մարզաձեւերում: Դրա համար հարկավոր է մեծ ցանկություն, համախմբվածություն, կամք, հավատ ու մի փոքր համբերություն: Վերջում ՀԱՕԿ-ի նախագահը Եվրոպայի չեմպիոններ Մելինե Դալուզյանին, Հռիփսիմե Խուրշուդյանին, կրկնակի չեմպիոն Գեւորգ Դավթյանին ու Եվրոպայի փոխչեմպիոն Արա Խաչատրյանին նվիրեց ՎԱԶ 21015 մակնիշի ավտոմեքենաներ, իսկ հավաքականների ու անձնական մարզիչներին պարգեւատրեց դրամական խոշոր մրցանակներով: