![\"\"](\"https://www.aravot.am/2007/aravot_arm/June/1/p7.jpg\")
Թեթեւագույն քաշային կարգում IBF-ի եւ IBO-ի վարկածներով աշխարհի չեմպիոն, վանաձորցի Վախթանգ (Վիկ) Դարչինյանը ներկայումս նախապատրաստվում է հուլիսի 7-ին Նոնիտո Դոների հետ մենամարտում չեմպիոնական իր գոտիների հերթական պաշտպանությանը:
Վախթանգն արդեն քանի տարի նպատակ ունի միավորել նաեւ մյուս վարկածներով չեմպիոնական տիտղոսները, սակայն բոլորը, ում նա ձեռնոց է նետում, ասես խոսքները մեկ արած, հրաժարվում են նրա հետ մենամարտել: Նրանցից է նաեւ թաիլանդցի, WBC-ի վարկածով աշխարհի չեմպիոն Պոնգսակլեկ Վոնգջոնկամը, ով պրոֆեսիոնալ ռինգում անցկացրած 67 մենամարտից հաղթել է 65-ում (34-ը՝ նոկաուտով): Հետաքրքիր է, որ թաիլանդցին իր բոլոր մենամարտերն անցկացնում է միայն իր հայրենիքում կամ Ճապոնիայում:
Օրերս արտասահմանյան լրատվամիջոցները տեղեկատվություն են տարածել, թե Վոնգջոնկամը վերջապես հետաքրքրություն է ցուցաբերել Վիկի հետ գոտիների միավորման մրցամարտի նկատմամբ եւ անգամ հայտարարել է, թե պատրաստ է ելույթ ունենալ Եվրոպայում կամ Ամերիկայում, պայմանով, որ իրեն պատկառելի հոնորար առաջարկեն: Սակայն հայ բռնցքամարտիկը, այնուամենայնիվ, դեռ կասկածում է, թե նման մրցամարտ կկայանա: Ու դրա համար նա բավականաչափ հիմքեր ունի: Նախ Վոնգջոնկամը բազմիցս հրաժարվել է այլ երկրներում մենամարտեր անցկացնել: Երկրորդ, նա հուլիսին չեմպիոնական գոտու պաշտպանության նշանակված մենամարտ ունի: Եվ երրորդ, մեկ մենամարտ էլ մշակման փուլում է:
«Ես արդեն կապվել եմ իմ պրոումոթեր Գերի Շոուի հետ,- հայտարարել է Վիկը:- Նա արդեն այդ մարտը կազմակերպելու պաշտոնական առաջարկը պատրաստել է: Մենք այն կարող ենք անցկացնել այս տարվա հոկտեմբերին կամ նոյեմբերին՝ Ամերիկայում: Հոնորարի չափը նրա համար արգելք չի կարող հանդիսանալ: Ես անհամբերությամբ եմ սպասում ռինգում նրա հետ հանդիպմանը, բայց, միեւնույն է, դեռ կասկածում եմ Վոնգջոնկամի մտադրությունների լրջությանը»:
Եթե Դարչինյան-Վոնգջոնկամ մենամարտը, այնուամենայնիվ, կազմակերպել չհաջողվի, Վիկը կտեղափոխվի մեկ աստիճան բարձր քաշային կարգ եւ կհանդիպի առաջին թեթեւագույն քաշային կարգում WBC-ի չեմպիոն մեքսիկացի Քրիստիան Միխարեսի հետ: Վերջինս այս տարվա ապրիլին հաղթել է իր հայրենակից Խորխե Արսեին, ով թեթեւագույն քաշում համարվում էր Վախթանգի գլխավոր մրցակիցը:
