![\"\"](\"https://www.aravot.am/2007/aravot_arm/June/6/p1.jpg\")
«Իմ վաղվա ճակատագիրը կախված չէ բնապահպանության նախարարի պաշտոնից եւ աթոռից, քանի որ նախկինում եղել եմ քաղաքապետ, զբաղեցրել տարբեր պաշտոններ»,- ըստ «Նոյյան տապանի», երեկ լրագրողների հետ զրույցում հայտարարեց ՀՀ բնապահպանության նախարար Վարդան Այվազյանը: Նրա խոսքերով՝ իր գործունեությունը չի սահմանափակվում միայն գործադիր իշխանությամբ. «կարեւորը քաղաքական գործունեությունը քաղաքական թիմի հետ միասին իրականացնելն է»,- ասաց նա: Իսկ hetq.am-ը հիշեցնում է, որ մամուլի հրապարակումներից միայն երկու ամիս անց նախարարը փորձեց հերքել այն տեղեկատվությունը, որ նա իր բարեկամների միջոցով տիրացել է մի շարք հանքավայրերի: «Ինչո՞ւ Վարդան Այվազյանը խոսեց հոդվածների հրապարակումից միայն երկու ամիս անց,- հարցնում է այդ էլեկտրոնային պարբերականի խմբագիր Էդիկ Բաղդասարյանը եւ պատասխանում:- Նա վերեւների հետ իր հարցերն արդեն լուծել է եւ հնարավոր է, նույնիսկ, նախարար մնա: Նա կարող է շարունակել ծաղկեցնել իր բիզնեսը, կարող է նորանոր հանքավայրեր ինքն իրեն, հարազատներին կամ իր ենթականերին նվիրել»:
