Սկսած 2002 թվականից՝ Մոսկվայի Սայաթ-Նովայի անվան գրական-հասարակական ֆոնդը ամեն տարի պատվավոր մրցանակներ է
շնորհում մեր երկրի մշակութային գործի նվիրյալներին:
Մրցանակները կրում են Սայաթ-Նովայի, Եղիշե Չարենցի, Պարույր Սեւակի եւ Հովհաննես Շիրազի անունները:
Առաջին մրցանակը 2002 թվականին հետմահու շնորհվել է Պարույր Սեւակին: Հենց նրա ծննդավայրում էլ՝ Արարատի մարզի Զանգակատուն գյուղում, ուր ամփոփված է եղերական մահով կյանքից հեռացած բանաստեղծի աճյունը, մրցանակներ ու պատվոգրեր են հանձնվում հասցեատերերին:
Այս տարի եւս բանաստեղծի մահվան օրը ուխտագնացություն եղավ բանաստեղծի շիրմին: Հայ աշուղների միության եւ մշակույթի մի խումբ գործիչներ՝ Մոսկվայի Սայաթ-Նովայի անվան գրական-հասարակական հիմնադրամի նախագահ, Հայ երիտասարդության աճի բարեգործական հիմնադրամի նախագահ, Հայ աշուղների միության նախագահ, բանաստեղծ, փիլիսոփայության դոկտոր Խաչիկ Կիրակոսյանի ղեկավարությամբ, այցելեցին Զանգակատուն գյուղ, ծաղիկներ դրեցին բանաստեղծի շիրմին: Այնուհետեւ Խաչիկ Կիրակոսյանը հանձնեց Պարույր Սեւակի անվան դիպլոմներ:
Աշուղական արվեստում ներդրած ավանդի համար դիպլոմների արժանացան աշուղներ Ռազմար Վարդումյանը (Ռազմար Սասունցի), Անդրանիկ Ղազարյանը (Անդրանիկ Ուջանցի), աշուղ եւ քամանչահար Հրաչիկ Մուրադյանը (Օրթախ), գրականագետ, չարենցագետ Դավիթ Գասպարյանը եւ գրող Իլյիչ Բեգլարյանը:
Ելույթ ունեցան բանասիրական գիտությունների դոկտոր Շավիղ Գրիգորյանը, ՀՀ ժողովրդական դերասան Վլադիմիր Աբաջյանը եւ ուրիշներ:
Նախաձեռնության հեղինակ Խաչիկ Կիրակոսյանն ասաց, որ այսուհետեւ եւս ըստ արժանվույն կգնահատվի մշակույթի ասպարեզում աչքի ընկնող գործիչների վաստակը: Նրանք կլինեն իր ղեկավարած կազմակերպությունների ուշադրության ծիրում:
Գալիք տարիներին նույն արարողակարգով դիպլոմներ կշնորհվեն նաեւ նկարչության եւ երաժշտության ասպարեզի գործիչներին:
