Հայաստանի պետական երիտասարդական նվագախումբը (գլխավոր դիրիժոր՝ Սերգեյ Սմբատյան) բժշկական համալսարանի Կարմիր դահլիճում երեկ հանդես եկավ բարեգործական համերգով, որի հասույթը տրամադրվելու է Շլոս Արենբերգ Զալցբուրգի սեմինարների կենտրոնի վերականգնման հիմնադրամին: 2009 թ. ապրիլի 20-ին հրդեհի պատճառով ամբողջությամբ այրվեց Շլոս Արենբերգ Զալցբուրգի սեմինարների կենտրոնը: Հայաստանի պետական երիտասարդական նվագախումբը, որը ստեղծվել է 2005 թ., արդեն ելույթ է ունեցել այնպիսի աշխարհահռչակ երաժիշտների հետ, ինչպիսիք են՝ Դենիս Մացուեւը, Վադիմ Ռեպինը, Վալերի Գերգիեւը եւ ուրիշները: Այն պատվով ներկայացրել է Հայաստանը աշխարհի տարբեր հանրաճանաչ դահլիճներում: Երաժիշտների մեծամասնությունն էլ Վլադիմիր Սպիվակովի անվան կրթաթոշակառուներն են: Հունիսի 1-ին էլ «Սինոփսիս Արմենիա» ընկերությունն ու Երիտասարդական նվագախումբը կստորագրեն համագործակցության հուշագիր: Այսուհետեւ նրանք միասին կանցկացնեն միջոցառումները:
