ՖԻՖԱ-ի կանոնների պահանջները հստակ են ու քննարկման ենթակա չեն: Դրանցից մեկը պահանջում է. «Մարզիկի մարզահագուստը չպետք է արտահայտի քաղաքական, կրոնական կամ անձնական ոչ մի համոզմունք»: Հենց այս չափորոշիչներով առաջնորդվելով՝ Ֆուտբոլային ասոցիացիաների միջազգային միությունը օրերս ֆուտբոլի Իրանի աղջիկների հավաքականին արգելեց մեկնել օգոստոսին Սինգապուրում կայանալիք պատանիների ամառային անդրանիկ օլիմպիական խաղեր: Այդ մասին պաշտոնապես հայտարարել է ՖԻՖԱ-ի գլխավոր քարտուղարը: Պատճառը իրանցի ֆուտբոլիստուհիների մարզահագուստն է, որով աղջիկները ոչ միայն պարտավոր են «թաքցնել» մարմնի մասերը, այլեւ՝ պարտադիր գլխաշոր կրել: Դա մարզուհիներին պարտադրում է Իրանի ազգային օլիմպիական կոմիտեն: ՖԻՖԱ-ի այս խիստ որոշումից հետո Սինգապուրում Իրանին փոխարինելու է Թաիլանդի հավաքականը:
