Oրերս Համազգային թատրոնում կայացավ Արմեն Մելիքսեթյանի բեմադրած «Երեք գրոշանոց օպերա» ներկայացման պրեմիերան՝ ըստ Բերթոլթ Բրեխտի: Գլխավոր դերերում էին՝ Ավո Խալաթյանը, Ալլա Սահակյանը, Արմինե Պողոսյանը, Կարեն Խաչատրյանը, Արմինե Անդրեասյանը, Նարինե Գրիգորյանը, Գագիկ Մադոյանը եւ Կարապետ Բալյանը: Պարերը բեմադրել էր Աննա Կարապետյանը, նկարիչը Դավիթ Մինասյանն էր: Գողեր, մարդասպաններ, կեղծ աղքատներ ու թալանչի գործարարներ, պոռնիկներ ու ծախված ոստիկաններ, անհայտ ճանապարհով հարստացած բանկիրներ ու պատերազմում անուն հանած ավազակներ… Կարճ ասած՝ համարյա մեր օրերի նման: Թվարկվածները կյանքի տերերն են Լոնդոնի կամ ցանկացած այլ քաղաքի թաղամասերից մեկում: «Երեք գրոշանոց օպերա» երաժշտական ներկայացումը հիշեցնում էր Կամերային երաժշտական թատրոնում Ա. Մելիքսեթյանի բեմադրած մյուս ներկայացումները: Ցավոք, արդեն քանի տարի է, այդ օջախը, որպես մյուզիքլի թատրոն, գոյություն չունի: Ժամանակին կարողացան ազատվել նրանից՝ ինչպես աչքից ու աչքացավից. աշխատանքից ազատեցին միմյանց հետ լեզու չգտնող տնօրեն Լեւոն Աբրահամյանին եւ գեղարվեստական ղեկավար Արմեն Մելիքսեթյանին: Հիմա ի՞նչ ունենք՝ ընդամենը «փորձարարական» թատրոն, որտեղ ժամանակ առ ժամանակ բեմադրություններ է անում այս կամ այն ռեժիսորը:
