Անցած տարվա աշնանը տեղի ունեցած ռուսական խոշորամասշտաբ ուսումնական զինավարժությունները չէին համապատասխանում ՆԱՏՕ-ի եւ Մոսկվայի միջեւ դրական հարաբերությունների ձեւավորման ոգուն եւ բավարար չափով թափանցիկ չէին: «Newsru»-ի մատուցմամբ, այդ մասին հայտարարել է Հյուսիսատլանտյան դաշինքի գլխավոր քարտուղար Անդերս Ֆոգ Ռասմուսսենը՝ Բրյուսելում BNS գործկալության հետ զրույցում՝ հավելելով, թե հույս ունի, որ հետագայում «մենք նման զինավարժություններ չենք տեսնի»: Միաժամանակ Ռասմուսսենը ընդգծել է, թե չի համարում, որ այդ զինավարժությունները սպառնալիք են հանդիսանում ՆԱՏՕ-ի դաշնակից որեւէ երկրի դեմ, նաեւ չի համարում, որ Ռուսաստանի կողմից կա ՆԱՏՕ-ի որեւէ երկրի դեմ ուղղված սպառնալիք: Հիշեցնենք, որ անցյալ տարվա սեպտեմբերին Ռուսաստանն ու Բելառուսը «Արեւմուտք-2009» ռազմաուսումնական համատեղ վարժանքներ էին անցկացրել բալթյան երկրների՝ Լիտվայի սահմանի անմիջական հարեւանությամբ:
