Երեկ ՀՀ սահմանադրական դատարանը պետք է շարունակեր ԱԺ ընտրությունների թիվ 10 ընտրատարածքի արդյունքների վիճարկման կապակցությամբ ԱԺ պատգամավորության թեկնածու Նիկոլ Փաշինյանի դիմումի քննությունը: ՍԴ-ն նախորդ նիստում որոշել էր գրավոր ընթացակարգով անցկացնել գործի քննությունը եւ այդ կապակցությամբ, ինչպես մեկ նախադասությամբ տեղեկացրեց զեկուցող, ՍԴ անդամ Ֆելիքս Թոխյանը, ստացվել էին պատասխանողների՝ Ընտրատարածքային ընտրական հանձնաժողովի եւ Կենտրոնական ընտրական հանձնաժողովի բացատրությունները: Դիմումատու կողմը երեկ դատարան չեկավ, քանի որ նախորդ նիստին հրաժարվել էին: Նրանք գտնում էին, որ առանց ԱԺ պատգամավորության թեկնածուի՝ ազատազրկման վայրում գտնվող Նիկոլ Փաշինյանի մասնակցության, հնարավոր չէ գործի բազմակողմանի քննություն: Հիշեցնենք, որ դիմումատու կողմը պահանջում էր անվավեր ճանաչել թիվ 10 ընտրատարածքի ընտրությունները: Դատարանը անցավ խորհրդակցական սենյակ: Ընտրատարածքային հանձնաժողովի հունվարի 14-ի 17-Ա որոշումը թողնել անփոփոխ: Դա նշանակում է, որ ընտրություններն անցել են առանց խախտումների:
