ԵՊՀ-ի եւ «Հայկական Փի Ար ասոցիացիա» գիտատեղեկատվական հ/կ-ի նախաձեռնությամբ երեկ ԵՊՀ գրադարանի նախասրահում տեղի ունեցավ «Գրքի տոն» ցուցահանդես-միջոցառում: Ներկայացվեցին ԵՊՀ հրատարակչության թողարկած գիտական, թարգմանական աշխատություններ, բառարաններ եւ այլն: ԵՊՀ հրատարակչության տնօրեն Պերճ Ստեփանյանի խոսքով, հրատարակչության գրքերի շնորհանդեսները ամենամյա բնույթ են կրում, բայց նման մասշտաբով եւ հատուկ խորագրով՝ առաջին անգամ է նշվում:
«ԵՊՀ հրատարակչությունը Հայաստանում ամենահներից է: Համալսարանում առաջին գիրքը լույս է տեսել դեռ 1920թ: 2009-2010 ուստարում գրանցել ենք ամենաբարձր ցուցանիշը. հրատարակվել է 200-ից ավելի անուն գիրք՝ 3390 մամուլ ծավալով: Սա խոսում է հրատարակչական գործընթացի եւ զարգացման մասին: Այս ցուցահանդեսը նվիրված է համալսարանի 90-ամյակին եւ իր տեսակով կոչ է երիտասարդներին, հատկապես ուսանողներին՝ ընթերցել գրքեր, հաճախ օգտվել գրադարաններից եւ ընթերցանությունը դարձնել հաճելի զբաղմունք»:
Ցուցահանդեսից զատ, որոշակի քանակությամբ գրքեր նվիրեցին այցելուներին, ուսանողներին, գրադարանների ներկայացուցիչներին:
