«Առավոտն» իր ընթերցողներին տեղեկացրել էր, որ Բաքվում մեկնարկող բռնցքամարտի աշխարհի առաջնությունում Հայաստանը ներկայացված է լինելու ութ մասնակցով: Սակայն աշխարհի առաջնության պաշտոնական կայքում հայտավորված բոլոր մասնակիցների վերջնական ցուցակում բացակայում էր մեր +91 կգ քաշային Արմեն Սիմոնյանի անունը: Հարեւան երկրի հետ կապի բացակայության պատճառով սկզբում մեր ֆեդերացիայում էլ դժվարացան կոնկրետ պարզաբանում տալ: Սակայն հետո տեղեկացրին, որ կապվել են մեր պատվիրակության ղեկավար Դերենիկ Գաբրիելյանի հետ եւ տեղեկացել, որ Արմեն Սիմոնյանն այնտեղ մարզման ժամանակ վնասվածք է ստացել եւ այդ պատճառով չի կարող հանդես գալ աշխարհի առաջնությունում: Այդուհանդերձ, մարզիկը հասկանալի պատճառներով մնում է մրցավայրում ու Երեւան կվերադառնա ընդհանուր պատվիրակության հետ:
