ՁԻԱՀ-ի դեմ պայքարի համաշխարհային օրվան ընդառաջ՝ «World Wision»-ի Հայաստանի գրասենյակը, «Իրական աշխարհ, իրական մարդիկ» հասարակական կազմակերպության հետ համատեղ, սկսել է «Հասնել Զրոյի» քարոզարշավը, որը 2008-2014 թվականների համար ընդունված եւ Հայաստանում իրականացվող «ՁԻԱՀ-ի կանխարգելում Հարավ-կովկասյան բնակիչների շրջանակում» ծրագրի բաղկացուցիչ է:
Լոռու մարզում ծրագիրն իրականացվում է Ստեփանավանի եւ Տաշիրի տարածաշրջանի այն 10 գյուղերում, որտեղից շատ են արտագնա աշխատանքի մեկնում: «Շատ դժվար էր ամենասկզբից գյուղերում աշխատել միգրանտների հետ, քանի որ ձմռանը եկել էին, գարնանը նորից պետք է գնային, դասընթացները ժամանակի կորուստ էին համարում»,- ասաց «Իրական մարդիկ, իրական աշխարհ» հ/կ նախագահ Սեմ Թադեւոսյանը:
Այժմ կազմակերպություններն աշխատում են աշակերտական խորհուրդների եւ դպրոցահասակ երեխաների հետ: Աշխատանքն ավելի արդյունավետ դարձնելու համար բուժկետերում, դպրոցներում ու գյուղապետարաններում ստեղծվել են գրադարաններ: «Պետք էր ինչ–որ բան թողնել, տեղում ծանոթանալու եւ գիտելիքները խաղերի միջոցով ամրապնդելու համար, այժմ համակարգչային խաղերի միջոցով էլ են տեղեկանում վարակից պաշտպանվելու տարբերակներին», -ասաց Սեմ Թադեւոսյանը:
1988-2011 հատվածում Հայաստանում գրանցվել է ՄԻԱՎ վարակի 1116 դեպք, որից 57-ը կամ 5 տոկոսը 25-39 տարեկաններ են:
Կարդացեք նաև
Քարոզարշավի հեղինակները տեղեկացրին, որ գործում են տարածքային կենտրոններ, որտեղ մարդիկ կարող են դիմել ու մնալ անանուն: Վանաձորում ՄԻԱՎ կանխարգելման տարածքային կենտրոնը գտնվում է Մոսկովյան 58 հասցում:
Նելլի ԴԱՎԹՅԱՆ
