«Ամնեսթի ինթերնեյշնըլ» կազմակերպությունը կրկին վերահնչեցնում է իր կոչը` անհապաղ ազատ արձակել Ջաբար Սավալանին: Հերթական անգամ այս հարցին իրավապաշտպան կազմակերպությունն անդրադարձավ այսօր Ադրբեջանի Գերագույն դատարանի կայացրած որոշումից հետո, որով ուժի մեջ մնաց քսանամյա քաղաքական ակտիվիստի հարցով ընդհանուր իրավասության ատյանի ընդունած որոշումը` երկուսուկես տարվա կալանքը:
«Ադրբեջանական դատարանը հերթական անգամ ցույց տվեց, որ Ադրբեջանում չկա օրենքի գերակայություն այն ժամանակ, երբ շոշափվում են քաղաքական շահեր», -ասել է Ջոն Դալհույսենը` Ամնեսթի ինթերնեյշնըլի փոխտնօրենը` Եվրոպայի եւ Կենտրոնական Ասիայի ծրագրերով:
Այս տարվա մայիսին Ջաբար Սավալանը դատարանի վճռով ազատազրկվեց երկուսուկես տարով` այն բանից հետո, երբ Ֆեյսբուքով կոչ արեց բողոքի ցույցի դուրս գալ ընդդեմ կառավարության: Նա մեղադրվեց թմրանյութի տարածման մեջ, սակայն ինչպես «Ամնեսթի ինթերնեյշնըլն» է կարծում` գործը «թխված» էր:
Նման համոզմունքի իրավապաշտպան կազմակերպությունը եկել է այն բանի արդյունքում, որ Ջաբարի արյան մեջ չի հայտնաբերվել թմրանյութ` անալիզը ցույց է տվել, որ Ջաբարը թմրանյութ ընդհանրապես չի օգտագործում, եւ նաեւ այն պատճառով, որ հավաստի է համարում այն պնդումները, որ ոստիկաններն են նրա մոտ «գցել» 0,74գ մարիխուանան, որը «հայտնաբերվել է» Սումգայիթի ոստիկանական բաժանմունքում:
Ասաբալի Մուստաֆաեւը` Ջաբարի փաստաբաններից մեկը, «Ամնեսթի ինտրնեյշնըլին» ասել է.«Մենք շատ փոքր հույս ունեինք, որ Գերագույն դատարանը արդար կդատի, սակայն նրա որոշումը մեզ չբավարարեց: Այժմ մենք այլընտրանք չունենք, քան այս գործը ներկայացնեք Մարդու իրավունքների եվրոպական դատարանին, եւ մենք դա կանենք որքան հնարավոր է շուտ»:
Ջաբարը համարվում է Ադրբեջանում ներկայումս ճաղերի հետեւում գտնվող խղճի 17 դատապարտյալներից մեկը:
Կարդացեք նաև
«Անցած ամիս Ադրբեջանն ընտրվեց ՄԱԿ-ի Անվտանգության խորհրդի անդամ, հաջորդ տարի այդ երկրում կանցնի Եվրատեսիլի մրցույթը, որն ամեն տարի դիտում է մոտ 125 մլն մարդ: Քանի որ Ադրբեջանը դրանով իսկ համաշխարհային ուշադրության կենտրունում է, դա շատ լավ ժամանակ է, որպեսզի այդ երկրի կառավարությունը լրջորեն վերաբերվի իր ստանձնած միջազգային պարտավորություններին` մարդու իրավունքների ոլորտում,-ասել է Դալհույսենը,-Իշխանությունները պետք է անհապաղ ազատ արձակեն Ջաբար Սավալանին եւ ներկայումս ճաղերի եւեւում գտնվող մյուս խղճի բանտարկյալներին»:
