Ազգային ժողովում այսօր համառորեն չէր ստացվում «ՀՀ օրենսդիր, գործադիր, դատական իշխանության մարմինների ղեկավար աշխատողների պաշտոնային դրույքաչափերի մասին ՀՀ օրենքում փոփոխություն եւ լրացում կատարելու մասին» եւ «Դատախազության մասին» ՀՀ օրենքում փոփոխություն կատարելու մասին օրինագծերի քվեարկությունը: Այս օրինագծերը նախատեսում են վերոնշյալ պաշտոնների աշխատավարձերի բարձրացում:
ԱԺ նախագահ Սամվել Նիկոյանը հարցը դրեց քվեարկության, եւ 55 կողմով չանցավ: Հետո տեղերից բողոքեցին, թե որոշ կոճակներ չեն աշխատել: «Ժառանգությունը» բողոքեց այս կապակցությամբ, որին ի պատասխան՝ Սամվել Նիկոյանը փորձեց պարզաբանել իրավիճակը, ապա, ձայն խնդրեց ՀՀԿ խմբակցության ղեկավար Գալուստ Սահակյանը, որը հայտարարեց, թե ստեղծվել է «սիտուացիա» եւ բացատրեց. «Սարքավորումները աշխատում են, բայց քանի որ վարման կարգի վերաբերյալ խնդրանք եղավ, այդ պահին մտածում էինք, որ վարման կարգի վերաբերյալ խոսք պիտի ասվեր, չենք քվեարկել, ես խնդրում եմ պրովոկացիաների չենթարկվել եւ կրկին քվեարկել»: Կրկին քվեարկեցին, լուսատախտակի վրա պահելով քվեարկության պատկերը: Այս անգամ օրինագիծն ընդունվեց 67 կողմ ձայնով: Բողոքներ չեղան եւ ԱԺ նախագահ Սամվել Նիկոյանը ուզեց իմանալ՝ Անահիտ Բախշյանը բավարարվա՞ծ է: Բողոքներ չեղան նաեւ այս դեպքում:
Մարգարիտ ԵՍԱՅԱՆ
