Մինչեւ 2013 թվականի հունվարի 1-ը մեր երկրում դեղարտադրության ոլորում պետք է ներդրվեն GMP (Եվրոպական պատշաճ արտադրության գործունեության կանոններ) չափանիշները:
Այսօր մեր երկրում գործող մի շարք դեղարտադրողներ սկսել են արդեն աշխատել այդ չափանիշներով: Այս մասին այսօր «Գոլդեն Թյուլիփ» հյուրանոցի մամուլի ակումբում հայտնեց առողջապահության նախարարության աշխատակազմի ղեկավար Սուրեն Քրմոյանը:
Պարոն Քրմոյանի խոսքերով, պատշաճ արտադրական գործունեությունը հնարավորություն կտա արտադրանքը որակյալ կերպով հասցնել սպառողին, ավելացնել ներդրումներն ու դեղերի արտադրությունը, ինչպես նաեւ արտահանել եվրոպական երկրներ. «Մեր խնդիրը հիմա այն է, որ մեր երկրում տրվող GMP սերտիֆիկատը ճանաչված լինի նաեւ Եվրոպայում»:
Նա տեղեկացրեց, որ արդեն իսկ մի քանի առաջատար դեղարտադրող ընկերություններ մեծ ներդրումներ են կատարել իրենց արտադրական հզորությունները մեծացնելու համար:
Այն դիտարկմանն ի պատասխան, որ Նուրբ օրգանական քիմիայի ինստիտուտի կողմից հայտնաբերած ամեն մի դեղը, ըստ Հայրենական արտադրողների միության նախագահ Վազգեն Սաֆարյանի, մեծ գումարներ արժե, սակայն դրանք արդեն շրջանառությունից դուրս են եկել, ասուլիսին ներկա «Լիկվոր» դեղագործական գործարանի տնօրեն Սերգեյ Մաթեւոսյանն ասաց. «Վազգեն Սաֆարյանը հեռու է դեղարտադրությունից: Աշխարհում յուրահատուկ դեղ կարող են արտադրել 4-5 մեծ ընկերություն եւ ամեն մեկի վրա ծախսում են $400-700 միլիոն: Նուրբ օրգանական քիմիայի ինստիտուտի դեղերն իրոք փայլուն դեղեր էին: Նրանք մշակել էին 30-40 տեսակ դեղ, բայց այդ դեղերն իրենց կյանքն ապրել են արդեն»:
Կարդացեք նաև
Անուշ ԽԵՉՈՅԱՆ
