«Ես նոր եմ տեղեկացել, որ համազեկուցողները Երեւան են գալիս, բայց, կարծում եմ, վաղը մենք՝ զոհերի հարազատներս, կորոշենք մեր անելիքը»,- Aravot.am-ի հետ զրույցում՝ պատասխանելով մեր հարցին, թե արդյոք պատրաստվո՞ւմ են հանդիպել հաջորդ շաբաթ Երեւան ժամանող ԵԽԽՎ-ում ՀՀ հարցով համազեկուցողներին, ասաց «Մարտի 1»-ի զոհը դարձած Գոռ Քլոյանի հայրը՝ Սարգիս Քլոյանը:
Համազեկուցողներն իրենց օրակարգում ձեզ հետ հանդիպում չեն նախատեսել, իսկ դուք համազեկուցողներին հանդիպելու ցանկություն կամ նրանց ասելիք ունե՞ք: «Իհարկե: Շատ ասելիք կա, ամենակարեւորը այն, որ չբացահայտվեց «Մարտի 1»-ի սպանդը: ՀՀ նախագահը հայտարարեց «Մարտի 1»-ի գործին նոր թափ հաղորդելու անհրաժեշտության մասին, բայց անցել է 7-8 ամիս՝ եւ ոչ մի բացահայտում: ՀՔԾ-ն հաղորդում հրապարակեց, որը հաղորդում չէր, ուղղակի խայտառակություն էր: Եթե համազեկուցողների հետ մեր հանդիպումը կայանա, մենք կներկայացնենք մեր բողոքը անցած 4 տարիների ընթացքում կատարվածի վերաբերյալ»,- մեր հարցադրմանն այսպես արձագանքեց Սարգիս Քլոյանը:
Հիշեցնենք, որ ժամանակին «Մարտի 1»-ի զոհերի հարազատները նաեւ որոշակի դժգոհություն հայտնեցին հենց համազեկուցողներից՝ ԵԽԽՎ մոնիտորինգի հանձնաժողովին ներկայացված զեկույցի առնչությամբ, որտեղ նշված էր, թե որոշակի պայմանների առկայության պարագայում «Մարտի 1»-ի էջը կարելի է փակված համարել: «Մենք համազեկուցողներից միշտ էլ դժգոհ ենք եղել: Գոհ ենք եղել միայն ԵԽ Մարդու իրավունքների հանձնակատար Թոմաս Համմարբերգից, որը թեեւ շատ էական բաներ չարեց մեզ համար, բայց ինչ-որ բան, գոնե, փորձում էր անել: Բոլոր դեպքերում մենք պետք է պայքարենք, տեսնենք՝ ինչ կլինի»,- եզրափակեց մարտիմեկյան զոհերից մեկի՝ Գոռ Քլոյանի հայրը:
