Երեկ «Անի» հյուրանոցում կայացած ասուլիսում լրագրողների հետ հանդիպեցին «Արմմոնո» փառատոնի հյուրերից ոմանք:
Վրոցլավի (Լեհաստան) մոնոներկայացումների միջազգային փառատոնի տնօրեն Վեցլավ Գերասը լրագրողներին հայտնեց, որ «Արմմոնո-2013» փառատոնին իրենք նախատեսել են լեհական երեք բեմադրություն, իսկ Վրոցլավի փառատոնի շրջանակներում կցուցադրվեն հայկական ներկայացումներ: Լեհական կողմը մտադիր է առաջիկայում քննարկումներ կազմակերպել իրենց լրատվամիջոցների ներկայությամբ՝ հայկական թատրոնի խնդիրներին եւ զարգացման ուղիներին ծանոթացնելու միտումով: Պարոն Գերասը, ով ամեն տարի պարտադիր այցելում է Հայաստան, «Արմմոնոյի» տնօրեն Մարիաննա Մխիթարյանին նվիրեց թատերական արձանիկ, նաեւ լեհական փառատոնի մասին պատմող գրքեր ու բուկլետներ:
Ասուլիսին ներկա էր նաեւ վրացի պրոդյուսեր Նինո Լապիաշվիլին, որը ներկայացնում էր Վ. Աբաշիձեի անվան թատրոնը: Նա էլ նշեց, որ երկրորդ անգամ է Հայաստանում, եւ Շեքսպիրյան փառատոնի միջոցով է բացահայտել մեր երկիրը. անցյալ տարի սեպտեմբերին վրացական թատրոնը «Մակբեթ» էր խաղում Հայաստանում: Վ. Աբաշիձեի անվան թատրոնը այսօր հայ հանդիսատեսի դատին կհանձնի «Փսիխոզ 4.48» ներկայացումը՝ ըստ Սառա Քեյնի: Ի դեպ, հատուկ «Արմմոնոյի» համար ներկայացումը վերաբեմադրել են մոնո-ձեւաչափով: Վրացական «Փսիխոզ 4.48»-ում խաղում է 2 դերասանուհի, որոնք, սակայն, բեմում չեն հանդիպելու:
Հիշեցնենք, որ «Արմմոնո» առաջին միջազգային թատերական փառատոնը կայացել է 2003թ. սեպտեմբերի 24-ին: Փառատոնի հիմնադիրն է ՀԹԳՄ նախագահ Հակոբ Ղազանչյանը: 2009-ին փառատոնն ընդլայնել է իր սահմանները եւ անցկացվել Սյունիքում, իսկ 2011-ին՝ նաեւ «Արցախում»: Այս տարի «Արմմոնոն» տոնում է հիմնադրման 10-ամյակը:
«Առավոտ» օրաթերթ