Մարտի 23-ին ՀՀ ոստիկանությունում տեղի է ունեցել խորհրդակցություն, որի ընթացքում քննարկվել են կառույցի գործառույթներն ու խնդիրները Ազգային ժողովի ժողովի ընտրությունների շրջանում: Ըստ ոստիկանության կայքէջում այսօր հրապարակված հաղորդագրության՝ «Խորհրդակցության ընթացքում քննարկվեց նաև ընտրական ցուցակների պատրաստման, ճշգրտման և ամբողջացման խնդիրը, որի իրականացումը նույնպես ոստիկանության իրավասության շրջանակում է:
Վլադիմիր Գասպարյանը օպերատիվ շտաբի անդամներին հրահանգեց առանձնակի ուշադրություն դարձնել ընտրությունների շրջանում հասարակական կարգի պահպանմանը՝ ընդգծելով, որ ոստիկանությունը պետք է գործի բացառապես օրենքի և օրինականության սահմաններում:
Համապատասխան ոլորտների պատասխանատուները ներկայացրին կատարված աշխատանքն ու առաջիկա խնդիրները: Ոստիկանության պետ Վլադիմիր Գասպարյանը հանձնարարեց խնդիրները պարզաբանել բոլոր ծառայողներին՝ ավագ սպայակազմից մինչև շարքային, վերստին կարևորելով յուրաքանչյուրի անձնական պատասխանատվությունը:
Ոստիկանության խնդիրը օրենքի առջև բոլորի հավասարության սկզբունքի իրականացումն է, իսկ ընտրությունների ժամանակ պետք է ընդգծվի ոստիկանության վերքաղաքական ու վերկուսակցական բնույթն ու գործունեությունը. Վլադիմիր Գասպարյանը խորհրդակցության մասնակիցներին հրահանգեց առաջնորդվել բացառապես այս սկզբունքով:
