ՀՀԿ գործադիր մարմնի անդամ Դավիթ Հարությունյանն այսօր հայտարարություն է տարածել, որում անդրադառնալով Ազգային ժողովի ընտրություններին մասնակցող ՀՅԴ-ի, ՀԱԿ-ի, «Ժառանգության» եւ ԲՀԿ-ի՝ հանրային վերահսկողության միջկուսակցական միասնական ընտրական շտաբ ստեղծելու փաստին, նկատում է. «ՀՀԿ–ն լավ ընտրությունների անցկացման համապարփակ ծրագրով հանդես էր եկել շատ ավելի վաղ, և այդ ծրագիրը պարունակում էր ոչ միայն գործընթացի հանրային վերահսկողությունը, այլ հարցերի շատ մեծ շրջանակ»: Չվիճարկելով հեղինակային իրավունքի խնդիրը, պարոն Հարությունյանն ընդգծում է. «Մեր կարծիքով մասնակից կուսակցությունները պետք է առաջին հերթին սահմանեն ընտրությունների պատշաճ անցկացման քաղաքակիրթ մրցակցությունն ապահովող կանոններ: Կանոններ, որոնք ստանձնվում են կամավոր: Կանոններ, որոնց պահպանումը մասնակից կուսակցությունների կողմից ի վերջո կհանգեցնի քաղաքական միջավայրի փոփոխության: Կանոններ, որոնց անվերապահ կիրառումը թույլ կտա հասնել այն իրավիճակի, երբ մասնակիցները կշնորհավորեն միմյանց ընտրությունների արդյունքներով՝ անկախ իրենց ստացած ձայների թվից» ու կոչ անում՝ «Եկե´ք բոլորս միասին կանգնենք մեջք մեջքի լավ ընտրությունների անցկացման հարցում ու իրականացնենք նման ընտրություններ»:
Մի քանի ամիս առաջ տեղի ունեցած ՀԱԿ- իշխող կոալիցիա երկխոսության ժամանակ, կոալիցիան՝ ի դեմս բանակցող իշխանական պատվիրակության ղեկավար Դավիթ Հարությունյանի, դեռ այն ժամանակ խոսում էր ազատ եւ արդար ընտրությունների ընթացքի վերահսկման միասնական մեխանիզմների մասին, որը, սակայն, այդպես էլ չհրապարակայնացվեց: Դավիթ Հարությունյանից Aravot.am-ը հետաքրքրվեց՝ արդյոք այսօր իր հնչեցրած առաջարկը երկխոսության շրջանակներում այդպես էլ չհրապարակված առաջարկն է: «Այո, ըստ էության, դա այդ առաջարկն է»,-ասաց պարոն Հարությունյանը: Մեր հարցին՝ ակնկալո՞ւմ է, որ քաղաքական ուժերը կարձագանքեն իր առաջարկին, պատասխանեց. «Հուսով եմ, որ կարձագանքեն»:
Նելլի ԳՐԻԳՈՐՅԱՆ
